മലപ്പുറം : കര്‍ഷകന്‍ വയലില്‍ കുഴഞ്ഞുവീണ് മരിച്ചു. മലപ്പുറം തിരുന്നാവായയിലെ കുറ്റിയത്ത് സുധി കുമാറിനെയാണ് വയലില്‍ മരിച്ച നിലയില്‍ കണ്ടെത്തിയത്. ഇയാളുടെ ദേഹമാസകലം പൊള്ളലേറ്റതിന്‍റെ പാടുകളും കരിവാളിപ്പുമുണ്ട്. രാവിലെ 9 മണിയോടെ സുഹൃത്തുക്കള്‍ക്കൊപ്പം വയലില്‍ ജോലിക്ക് പോയതായിരുന്നു സുധികുമാര്‍.
സുഹൃത്തുക്കള്‍ പിന്നീട് പള്ളിയില്‍ പോകാനായി വയലില്‍ നിന്നും തിരിച്ചുപോന്നു. ഇയാളെ ഫോണില്‍ വിളിച്ചിട്ടും എടുക്കാതിരുന്നതിനെത്തുടര്‍ന്ന് സുഹൃത്തുക്കള്‍ തിരിച്ച്‌ വയലിലെത്തിയപ്പോഴാണ് പൊള്ളലേറ്റ് മരിച്ച നിലയില്‍ കണ്ടെത്തിയത്.
മരണകാരണം സൂര്യാതപമാണെന്നാണ് പ്രാഥമിക നിഗമനം. എന്നാല്‍ ഇക്കാര്യത്തില്‍ സ്ഥിരീകരണമായിട്ടില്ല. മരണം സൂര്യാതപം ഏറ്റെന്ന് പറയാനാകില്ലെന്ന് മലപ്പുറം ഡിഎംഒ പ്രതികരിച്ചു. പോസ്റ്റ്മോര്‍ട്ടം റിപ്പോര്‍ട്ട് വന്നാലേ കൂടുതല്‍ അറിയാനാകൂ.
മരണശേഷവും ശരീരത്തില്‍ പൊള്ളലുണ്ടാകാന്‍ സാധ്യതയുണ്ട്. രാവിലെ 8 മണി മുതലാണ് ഇയാള്‍ വയലിലുണ്ടായിരുന്നത്. 11.30നാണ് മരണം. ഇത് സാധാരണയായി സൂര്യാതപം ഏല്‍ക്കുന്ന സമയമല്ലെന്നും അദ്ദേഹം വ്യക്തമാക്കി.
