തിരുവനന്തപുരം: സംസ്ഥാനത്തെ പുതുക്കിയ കോവിഡ് നിയന്ത്രണങ്ങള്‍ ആരോഗ്യ മന്ത്രി വീണ ജോര്‍ജ് അറിയിച്ചു. ട്രിപ്പിള്‍ ലോക്ക്ഡൗണ്‍ ഇല്ലാത്ത ഇടങ്ങളില്‍ ആഴ്ചയില്‍ ആറു ദിവസവും കടകള്‍ തുറക്കാം. രാത്രി ഒന്‍പതു വരെ പ്രവര്‍ത്തിക്കാം. 25 ചതുരശ്ര അടിയില്‍ ഒരാള്‍ വീതം എന്ന നിയന്ത്രണം പാലിക്കണം. ആര്‍ടിപിസിആര്‍ ടെസ്റ്റ് നടത്തുന്നവരോ രണ്ടു ഡോസ് വാക്സിനെടുത്തവരോ മാത്രം കടകളില്‍ പോകുന്നതാണ് അഭികാമ്യമെന്നും മന്ത്രി വ്യക്തമാക്കി.
കോവിഡ് പ്രതിരോധ നടപടികള്‍ വിജയകരമെന്ന് ആരോഗ്യ മന്ത്രി നിയമസഭയില്‍ പറഞ്ഞു. ഒരു മാസം ഒരു കോടി പേര്‍ക്ക് വാക്സിന്‍ നല്‍കാനാണ് സര്‍ക്കാര്‍ ആലോചിക്കുന്നത്. കേന്ദ്രസര്‍ക്കാരില്‍ നിന്ന് കൃത്യമായി ഡോസുകള്‍ ലഭിച്ചാല്‍ ഇത് സാധ്യമാകുമെന്നും മന്ത്രി പറഞ്ഞു.
അതിനിടെ, ടിപിആര്‍ അടിസ്ഥാനപ്പെടുത്തിയുള്ള ലോക്ക്ഡൗണ്‍ രീതി മാറ്റിയിട്ടുണ്ട്. ആയിരത്തില്‍ എത്ര പേര്‍ക്കാണ് രോഗം എന്നത് കണക്കിലെടുത്തിട്ടാകും ഇനി നിയന്ത്രണങ്ങള്‍. ടിപിആര്‍ അടിസ്ഥാനപ്പെടുത്തി മൈക്രോ കണ്ടെയ്ന്‍മെന്‍റ് സോണുകള്‍ രൂപീകരിച്ചാണ് ഇതുവരെ ലോക്ക്ഡൗണ്‍ നടപ്പാക്കി വന്നിരുന്നത്.
ലോക്ക്ഡൗണ്‍ ഇളവുകള്‍
ഞായറാഴ്ച മാത്രം ലോക്ക്ഡൗണ്‍
കടകള്‍ ആഴ്ചയില്‍ ആറ് ദിവസം തുറക്കാം. രാത്രി ഒന്‍പതു വരെ തുറക്കാം
മൂന്നാം ഓണത്തിനും സ്വാതന്ത്ര്യദിനത്തിനും ലോക്ക്ഡൗണ്‍ ഇല്ല
കല്യാണ-മരണ ചടങ്ങുകളില്‍ 20 പേര്‍
ആരാധനാലയങ്ങളില്‍ പരമാവധി 40 പേര്‍
1000 പേരില്‍ പത്തില്‍ കൂടുതല്‍ രോഗികളുണ്ടാവുന്ന സ്ഥലങ്ങളില്‍ ട്രിപ്പിള്‍ ലോക്ക്ഡൗണ്‍. ഓരോ
ആഴ്ചയിലും കണക്ക് അടിസ്ഥാനമാക്കി നിയന്ത്രണം