പാലക്കാട് / പട്ടാമ്പി : പക്ഷിനിരീക്ഷണവും പക്ഷികളെ കുറിച്ചുള്ള പഠനവും പ്രോത്സാഹിപ്പിക്കാൻ പട്ടാമ്പി ഭാരതപ്പുഴയിൽ കേരള സാമൂഹ്യ വനവൽക്കരണ വിഭാഗം പക്ഷി സർവ്വേ സംഘടിപ്പിച്ചു. ഉദ്യോഗസ്ഥർക്കു പുറമേ മുൻകൂട്ടി രജിസ്റ്റർ ചെയ്ത് പ്രത്യേകം അവസരം ലഭിച്ച തൽപ്പരരായ 45 പേർ സർവ്വേയിൽ പങ്കെടുത്തു.
ഭാരതപ്പുഴയിൽ പട്ടാമ്പി പാലത്തിന് കിഴക്ക് വശം നാല് വ്യത്യസ്ത ഭാഗങ്ങളിലേക്ക് നാല് ടീമുകളായി തരംതിരിച്ചാണ് നിരീക്ഷണങ്ങൾ നടന്നത്. രാവിലെ ആറ് മണിക്ക് ആരംഭിച്ച നിരീക്ഷണം 9:00 വരെ തുടർന്നു.
റെഡ് വാട്ടൽഡ് ലാപ് വിങ്, ഗ്രീൻ സാൻഡ് പിപ്പർ, ഏഷ്യൻ ഓപ്പൺ ബിൽ, വൂളി നെക്ക്ഡ് സ്ട്രോക്, പെയിന്റേഡ് സ്ട്രോക്, ഓറിയന്റൽ ഡാർട്ടർ, ഗ്രേയ് ഹെറോൻ, കാറ്റൽ എഗ്രെറ്റ് തുടങ്ങി അറുപതോളം ഇനങ്ങളിൽ പെട്ട പക്ഷികളെ നിരീക്ഷണത്തിൽ കണ്ടെത്തി. മറ്റെവിടെയും കണ്ടെത്താത്ത സ്പൈസിസ് സ്പാരോ ലാർക്ക് എന്ന അപൂർവയിനം പക്ഷിയും കൂട്ടത്തിലുണ്ടായിരുന്നു.
തൃശൂർ ഫോറസ്ട്രി കോളേജ്, പട്ടാമ്പി ഗവ സംസ്കൃത കോളേജ് എൻഎസ്എസ് അംഗങ്ങൾ, പ്രശസ്ത പക്ഷി നിരീക്ഷകരായ വർണ്ണം സുകുമാരൻ, ആർ ശിവകുമാർ,മനോജ് എടത്തറ,സികെ സ്മിത, ഷബീർ തുറക്കൽ, സോഷ്യൽ ഫോറസ്ട്രി പാലക്കാട് ഡി എഫ് ഓ ജി ഹരികൃഷ്ണൻ നായർ, ഫോറസ്റ്റ് റേഞ്ച് ഓഫീസർമാരായ കെ അബ്ദുൽറസാഖ്, പി ശ്രീകുമാർ, സെക്ഷൻ ഫോറസ്റ്റ് ഓഫീസർമാരായ ബി എസ് ഭദ്രകുമാർ, എംഡി വർഗീസ് നേതൃത്വം നൽകി.
നിരീക്ഷണത്തിൽ ലഭിച്ച വിവരങ്ങൾ അനുസരിച്ച് ക്രോഡീകരിച്ച് വിശദമായ റിപ്പോർട്ട് തയ്യാറാക്കുമെന്നും തുടർ പ്രവർത്തനങ്ങളുമായി മുന്നോട്ടു പോകുമെന്നും ജില്ലാ ഫോറസ്റ്റ് ഓഫീസർ ഹരികൃഷ്ണൻ നായർ പറഞ്ഞു
