കൊച്ചി: സംസ്ഥാനത്ത് വാണിജ്യ പാചകവാതക സിലിണ്ടറുകളുടെ വിതരണം നിലച്ചതോടെ ഹോട്ടൽ മേഖലയും പൊതുസംവിധാനങ്ങളും കടുത്ത പ്രതിസന്ധിയിലേക്ക്. ഐ.ഒ.സി., ബി.പി.സി.എൽ. തുടങ്ങിയ പ്രമുഖ കമ്പനികൾ സിലിണ്ടറുകൾ നിറയ്ക്കുന്നത് നിർത്തിവെച്ചതോടെ സംസ്ഥാനത്തെ 20 ശതമാനത്തോളം ഹോട്ടലുകൾ ബുധനാഴ്ച അടഞ്ഞുകിടന്നു. ഗ്യാസ് വിതരണം തടസ്സപ്പെട്ടതോടെ പല സ്കൂളുകളിലും ഉച്ചഭക്ഷണത്തിനായി വീണ്ടും വിറകടുപ്പുകളെ ആശ്രയിക്കേണ്ടി വരുന്ന സാഹചര്യമാണ് നിലവിലുള്ളത്.
ആശുപത്രികൾ ഉൾപ്പെടെയുള്ള അവശ്യസേവന മേഖലകൾക്ക് മാത്രമായി വാണിജ്യ സിലിണ്ടറുകളുടെ വിതരണം പരിമിതപ്പെടുത്താൻ കേന്ദ്ര സർക്കാർ നിർദ്ദേശം നൽകിയതാണ് നിലവിലെ പ്രതിസന്ധിക്ക് കാരണം. ഇതോടെ ഹോട്ടലുകൾക്ക് ഉടനടി സിലിണ്ടർ വിതരണം ഉണ്ടാകില്ലെന്ന് പെട്രോളിയം കമ്പനികൾ അറിയിച്ചു. ശ്മശാനങ്ങളുടെ പ്രവർത്തനത്തെയും ഈ ഇന്ധനക്ഷാമം കാര്യമായി ബാധിച്ചിട്ടുണ്ട്.