സോളാര്‍ പീഡനക്കേസിലെ തെളിവെടുപ്പിനായി സിബിഐ സംഘം ക്ലിഫ് ഹൗസില്‍ എത്തി. മുന്‍ മുഖ്യമന്ത്രി ഉമ്മന്‍ചാണ്ടിക്കെതിരായ ലൈംഗിക പീഡന പരാതി കേസിലാണ് തെളിവെടുപ്പ്. പരാതിക്കാരിയേയും കൂട്ടിയാണ് സിബിഐ സംഘം തെളിവെടുപ്പിന് എത്തിയത്. സോളാര്‍ പീഡന പരാതിയില്‍ സംസ്ഥാന സര്‍ക്കാര്‍ കൈമാറിയ ആറ് കേസുകളാണ് സിബിഐ അന്വേഷിക്കുന്നത്. കോണ്‍ഗ്രസ് നേതാക്കള്‍ക്കും ബിജെപി നേതാവായ അബ്ദുള്ള കുട്ടിക്കെതിരെയുമാണ് സിബിഐ എഫ്‌ഐആര്‍ രജിസ്റ്റര്‍ ചെയ്തിരിക്കുന്നത്. എംഎല്‍എ ഹോസ്റ്റലില്‍ ഹൈബി ഈഡനുമായി ബന്ധപ്പെട്ട കേസില്‍ സിബിഐ സംഘം നേരത്തെ തെളിവെടുപ്പ് നടത്തിയിരുന്നു. അടൂര്‍ പ്രകാശിനെതിരായ പരാതിയില്‍ ആലപ്പുഴയില്‍ മഹസറും തയ്യാറാക്കി. ഒരു കേസുമായി ബന്ധപ്പെട്ട് മുഖ്യമന്ത്രിയുടെ ഔദ്യോഗിക വസതിയില്‍ സിബിഐ സംഘം എത്തുന്നത് ഇത് ആദ്യമായാണ്. ലൈംഗിക പീഡനക്കേസിലാണ് അന്വേഷണം എന്നതും എടുത്തുപറയേണ്ടതാണ്. 2012 ല്‍ മുഖ്യമന്ത്രിയായിരുന്ന ഉമ്മന്‍ചാണ്ടി പരാതിക്കാരിയെ ക്ലിഫ് ഹൗസിലേക്ക് വിളിച്ച് വരുത്തുകയും അവിടെ വച്ച് ലൈംഗികമായി പീഡിപ്പിക്കുകയും ചെയ്തുവെന്നാണ് പരാതി. ക്ലിഫ് ഹൗസ് സന്ദര്‍ശിക്കുകയും മഹസര്‍ തയ്യാറാക്കുകയുമാണ് സിബിഐ ഉദ്യോഗസ്ഥര്‍ ചെയ്യുന്നത്.
