വാക്സീന്‍ നല്‍കി വരുന്ന ഇടവേള കുറയ്ക്കണോ എന്ന് ആലോചിക്കാനുള്ള നിര്‍ദ്ദേശവും കേന്ദ്രം കേരള സര്‍ക്കാരിന് മുന്‍പില്‍ വെച്ചിട്ടുണ്ട്. ഓണം പ്രമാണിച്ച് ഇളവുകള്‍ ഉദാരമായി തുടരുന്ന കേരളത്തില്‍ കോവിഡിന്റെ അതിവ്യാപനമാണെന്നും പ്രതിരോധ നടപടികളില്‍ വന്‍ വീഴ്ചയുണ്ടായെന്നും കേന്ദ്രത്തിന്റെ മുന്നറിയിപ്പ്. കേരളത്തില്‍ കൊറോണ വ്യാപനം രൂക്ഷമായി തുടരുന്നതിനുള്ള കാരണങ്ങള്‍ അക്കമിട്ട് പറയുകയാണ്, കേരള സന്ദര്‍ശനം കഴിഞ്ഞ് മടങ്ങിയ കേന്ദ്രസംഘം. ലോക്ഡൗണ്‍ നിയന്ത്രണങ്ങള്‍ ഉള്‍പ്പെടെ കാര്യക്ഷമമല്ലാത്തതാണ് കേരളത്തില്‍ രോഗവ്യാപനം കുറയാത്തതിന് കാരണമെന്ന് കേന്ദ്രസംഘം വ്യക്തമാക്കി. ഇതുമായി ബന്ധപ്പെട്ട റിപ്പോര്‍ട്ട് സംഘം കേന്ദ്രസര്‍ക്കാരിന് കൈമാറി.
സംസ്ഥാനത്ത് കൊറോണ ബാധിതരെയും, സമ്പര്‍ക്കം പുലര്‍ത്തിയവരെയും വീടുകളില്‍ പാര്‍പ്പിച്ചാണ് നിരീക്ഷണം നടത്തുന്നത്. ഇത് കാര്യക്ഷമമല്ലാത്തത് പ്രതിദിന രോഗബാധയും ടിപിആറും വര്‍ദ്ധിക്കാന്‍ കാരണമാകുന്നുണ്ട്. സംസ്ഥാനത്ത് ഗ്രാമ- നഗര അന്തരം ഇല്ലാത്തത് രോഗ തീവ്രത വര്‍ദ്ധിക്കുന്നതിനുള്ള മറ്റൊരു കാരണമായി കേന്ദ്രസംഘം ചൂണ്ടിക്കാട്ടുന്നു.
കേരളത്തില്‍ മുതിര്‍ന്ന പൗരന്മാരുടെ എണ്ണം മറ്റ് സംസ്ഥാനങ്ങളെ അപേക്ഷിച്ച് കൂടുതലാണ്. ജീവിതശൈലി അസുഖങ്ങള്‍ ഉള്ളവരുടെ എണ്ണം കൂടുതലാണ് എന്നതും രോഗവ്യാപനം വര്‍ദ്ധിക്കുന്നതിന് ഇടയാക്കുന്നുണ്ട്.
പ്രാദേശിക ലോക്ഡൗണ്‍ കര്‍ശനമല്ലാത്തത് രോഗവ്യാപനം ഉയരുന്നതിന് കാരണമായി. അതിനാല്‍ പ്രാദേശിക ലോക്ഡൗണ്‍ കര്‍ശനമാക്കണമെന്ന നിര്‍ദ്ദേശവും റിപ്പോര്‍ട്ടിലുണ്ട്. നിലവില്‍ കേരളത്തില്‍ നല്‍കിയിരിക്കുന്ന ഇളവുകള്‍ വെല്ലുവിളിയാകുമെന്ന മുന്നറിയിപ്പും കേന്ദ്രസംഘത്തിന്റെ റിപ്പോര്‍ട്ടിലുണ്ട്. വാക്സീന്‍ നല്‍കി വരുന്ന ഇടവേള കുറയ്ക്കണോ എന്ന് ആലോചിക്കാനുള്ള നിര്‍ദ്ദേശവും കേന്ദ്രം കേരള സര്‍ക്കാരിന് മുന്‍പില്‍ വെച്ചിട്ടുണ്ട്.
കേരളത്തിലെ ടെസ്റ്റ് പോസിറ്റിവിറ്റി 16 ശതമാനത്തിലേക്ക് ഉയരുകയാണ്. ഈമാസം മുഴുവനും ഇളവുകള്‍ തുടരുമെന്നതിനാല്‍ ഓണക്കാലത്തെ കോവിഡ് അതിജീവനം കടുത്ത വെല്ലുവിളിയാകും. രാജ്യത്ത് കോവിഡ്കേസുകള്‍ കുറയുമ്പോള്‍ കേരളത്തില്‍ ഡെല്‍റ്റാ വകഭേദം വഴിയാണ് അതിവ്യാപനം. കഴിഞ്ഞയാഴ്ച രാജ്യത്തുണ്ടായ പ്രതിദിന കേസുകളുടെ പകുതിയിലേറെയും ( 51.51%) കേരളത്തിലാണെന്നും, രണ്ടാഴ്ചയായി കേരളത്തില്‍ കേസുകള്‍ ഉയരുന്നുണ്ടെന്നും കേന്ദ്ര ആരോഗ്യമന്ത്രാലയം ചൂണ്ടിക്കാട്ടുന്നു.