ലോകപ്രശസ്ത ചരിത്രകാരനും കറുത്തവര്‍ഗക്കാരുടെ അവകാശങ്ങള്‍ക്കു വേണ്ടി പ്രവര്‍ത്തിക്കുന്നയാളുമായ ഡോ. റുനോക്കോ റാഷിദി അന്തരിച്ചു. 67 വയസ്സായിരുന്നു. ആഗോളതലത്തില്‍ തന്നെ ആഫ്രിക്കന്‍ വംശജരുടെയും കറുത്ത വര്‍ഗക്കാരുടെയും അസ്തിത്വത്തിലും അവസ്ഥയിലും അതീവ താല്‍പ്പര്യം പ്രകടിപ്പിച്ചിരുന്ന ഇദ്ദേഹം മികച്ച എഴുത്തുകാരനും പ്രഭാഷകനുമാണ്. ഇന്ത്യ, ഓസ്‌ട്രേലിയ, പസഫിക് ദ്വീപുകള്‍ എന്നിവിടങ്ങളിലെ ആഫ്രിക്കന്‍ സാന്നിധ്യത്തെ കുറിച്ചുള്ള വിഷയങ്ങളില്‍ അതീവതല്‍പരനായ ഡോ. റുനോക്കോ റാഷിദി 10ലേറെ രാജ്യങ്ങളിലായി 90ലേറെ സര്‍വകലാശാലകളില്‍ പ്രഭാഷണം നടത്തിയിട്ടുണ്ട്. ക്ലാസിക്കല്‍ ആഫ്രിക്കന്‍ സിവിലൈസേഷന്റെ രചയിതാവും എഡിറ്ററുമാണ്. ഡോ. ഇവാന്‍ വാന്‍ സെര്‍ട്ടിമയോടൊപ്പം ‘ആഫ്രിക്കന്‍ സാന്നിധ്യം’ എന്ന പുസ്തകത്തിന്റെ സഹ രചയിതാവായിട്ടുണ്ട്. ഈ വിഷയത്തില്‍ പ്രസിദ്ധീകരിച്ച ഏറ്റവും സമഗ്രമായ പുസ്തകമാണിത്. കറുത്ത വര്‍ഗക്കാരെ കുറിച്ചുള്ള നിരവധി പുസ്തകങ്ങള്‍ രചിച്ചിട്ടുണ്ട്. ഓണ്‍ലൈനില്‍ സജീവമായിരുന്ന റാഷിദി ‘ആഫ്രിക്കയുടെ കണ്ണിലൂടെ ഇന്ത്യ കാണുക’ എന്ന പേരില്‍ ഇന്ത്യയിലേക്കുള്ള ഒരു വിദ്യാഭ്യാസ യാത്ര ഏകോപിപ്പിച്ചിട്ടുണ്ട്. ബ്ലാക്ക് സ്റ്റാര്‍: ദ ആഫ്രിക്കന്‍ പ്രസന്‍സ് ഇന്‍ ഏര്‍ളി യൂറോപ്, ആഫ്രിക്കന്‍ പ്രസന്‍സ് ഇന്‍ ഏര്‍ളി ഏഷ്യ, ആഫ്രിക്കന്‍ സ്റ്റാര്‍ ഓവര്‍ ഏഷ്യ: ദി ബ്ലാക്ക് പ്രസന്‍സ് ഇന്‍ ദ ഈസ്റ്റ്, മൈ ഗ്ലോബല്‍ ജേണി ഇന്‍ സെര്‍ച്ച്‌ ഓഫ് ദി ആഫ്രിക്കന്‍ പ്രസന്‍സ് തുടങ്ങിയ പുസ്തകങ്ങള്‍ രചിച്ചിട്ടുണ്ട്.
