വാഷിംഗ്ടണ്‍: പ്രായമായവരില്‍ ഫൈസര്‍ വാക്സിന് 95 ശതമാനത്തിലധികം ഫലപ്രദമെന്ന് ഗവേഷകര്‍. ദി ലാന്‍സെറ്റില്‍ പ്രസിദ്ധീകരിച്ച പഠനത്തിലാണ് ഇക്കാര്യം വ്യക്തമാക്കിയിരിക്കുന്നത്. രോഗലക്ഷണമുള്ളതും ലക്ഷണവുമില്ലാത്ത കോവിഡ് അണുബാധ തടയുന്നതിന് രണ്ട് ഡോസ് ഫൈസര്‍ വാക്സിന് എല്ലാ പ്രായക്കാര്‍ക്കും ഫലപ്രദമാണെന്നും പഠനത്തില്‍ വ്യക്തമാക്കുന്നു.
കോവിഡ് മരണനിരക്ക് ഗണ്യമായി കുറയ്ക്കുന്നതിനും രോഗികളുടെ ആശുപത്രി പ്രവേശനം ഒഴിവാക്കാനും ഫൈസര്‍ വാക്സിന്റെ രണ്ട് ഡോസുകള്‍ ഫലപ്രദമാണെന്ന് ഗവേഷകര്‍ ചൂണ്ടിക്കാട്ടുന്നു. ഇസ്രായേലിലെ ജനങ്ങളില്‍ നടത്തിയ നിരീക്ഷണങ്ങളില്‍ നിന്നാണ് ഗവേഷകര്‍ ഇത്തരമൊരു വിലയിരുത്തലിലെത്തിയത്.
ഇസ്രായേലിലെ ജനങ്ങള്‍ക്ക് ഫൈസര്‍ വാക്സിന് വ്യാപകമായി വിതരണം ചെയ്തിരുന്നു. വാക്സിന്റെ അടിയന്തര ഉപയോഗത്തിന് അനുമതി ലഭിച്ച ശേഷം 16 വയസ് മുതലുള്ള 65 ലക്ഷം പൗരന്മാര്‍ക്കാണ് ഇസ്രായേല്‍ പ്രതിരോധ കുത്തിവയ്പ്പ് നല്‍കിയത്. വാക്സിന് സ്വീകരിച്ചവരെ നിരീക്ഷിച്ചാണ് ഗവേഷകര്‍ പഠനം നടത്തിയത്.
രാജ്യവ്യാപക വാക്സിനേഷന്‍ നടത്തിയ ആദ്യ നാല് മാസങ്ങളിലെ നിരീക്ഷണ വിവരങ്ങള്‍ ഗവേഷകര്‍ ശേഖരിച്ച്‌ രോഗലക്ഷണമില്ലാത്ത അണുബാധ, രോഗലക്ഷണമുള്ള അണുബാധ, ആശുപത്രി പ്രവേശനം, ഗുരുതര രോഗം, മരണം എന്നിവ അടിസ്ഥാനമാക്കിയാണ് ഫൈസര്‍ വാക്സിന്റെ ഫലപ്രാപ്തി ഗവേഷകര്‍ കണക്കാക്കിയത്.
