ആദ്യം കാർഡ് തട്ടിയെടുത്തു. പിന്നാലെ അന്വേഷണത്തിന്റെ ഭാഗമാണെന്ന് പറഞ്ഞ് പിന് നമ്പര് സ്വന്തമാക്കി.
കണ്ണൂര്: മോഷണക്കേസിലെ പ്രതിയുടെ ബന്ധുവിന്റെ എടിഎം കാര്ഡ് കൈക്കലാക്കി പൊലീസുകാരന് പണം കവര്ന്നു. തളിപ്പറമ്പ് പൊലീസ് സ്റ്റേഷനിലെ സി പി ഒ കടന്നപ്പള്ളി സ്വദേശി ശ്രീകാന്താണ് എ ടി എം കാര്ഡ് കൈക്കലാക്കി അരലക്ഷം രൂപ കവര്ന്നത്. ഗോകുല് എന്നയാളെ നേരത്തെ എടിഎം കാര്ഡ് മോഷ്ടിച്ച കേസില് പൊലീസ് അറസ്റ്റ് ചെയ്തിരുന്നു. ഇയാളില്നിന്ന് സഹോദരിയുടെ എടിഎം കാര്ഡും കണ്ടെടുത്തു. ഈ കാര്ഡാണ് പൊലീസുകാരനായ ശ്രീകാന്ത് കൈക്കലാക്കിയത്.
തുടര്ന്ന് അന്വേഷണത്തിന്റെ ഭാഗമാണെന്ന് പറഞ്ഞ് ഗോകുലിന്റെ സഹോദരിയില്നിന്ന് എ ടി എം കാര്ഡിന്റെ പിന് നമ്പര് സ്വന്തമാക്കി. ഇതിനുശേഷം 9500 രൂപ പിന്വലിച്ചതായും ബാക്കി പണം കൊണ്ട് സാധനങ്ങള് വാങ്ങിയെന്നുമാണ് കണ്ടെത്തിയിരിക്കുന്നത്. സംഭവത്തില് പരാതി ലഭിച്ചതോടെ പൊലീസ് കേസെടുത്ത് അന്വേഷണം ആരംഭിച്ചു. ശ്രീകാന്തിനെ സര്വീസില്നിന്ന് സസ്പെന്ഡ് ചെയ്തതായി റൂറല് എസ്.പി. അറിയിച്ചു.