മുംബൈ : പത്ത് ദിവസത്തിന് മുന്പ് പരോളിലിറങ്ങിയ പീഡന കേസിലെ പ്രതി രണ്ട് വയസുകാരിയെ ക്രൂരമായി ബലാത്സംഗം ചെയ്ത് കൊലപ്പെടുത്തി. മഹാരാഷ്ട്രയിലെ റായ്ഗഡ് ജില്ലയിലാണ് ക്രൂരസംഭവം റിപ്പോര്ട്ട് ചെയ്തിരിക്കുന്നത്. ബലാത്സംഗം, മോഷണം ഉള്പ്പടെ നിരവധി കേസുകളില് പ്രതിയായ ആദേഷ് പാട്ടീലാണ് രണ്ട് വയസുള്ള ആദിവാസി പെണ്കുട്ടിയെ ക്രൂരമായി ബലാത്സംഗം ചെയ്ത ശേഷം കൊലപ്പെടുത്തിയത്. തുടര്ന്ന് മൃതദേഹം അയാള് വീടിന് സമീപത്തേയ്ക്ക് വലിച്ചെറിയുകയായിരുന്നു.
ചൊവ്വാഴ്ച രാത്രിയിലാണ് നാടിനെ നടുക്കിയ സംഭവമുണ്ടായത്. രാത്രിയില് വീടിന് സമീപമെത്തിയ ഇയാള് വീടിനുള്ളിലേക്ക് ഒളിഞ്ഞുനോക്കിയ ശേഷം ഉറങ്ങിക്കിടന്ന പെണ്കുട്ടിയെ തട്ടിക്കൊണ്ടു പോവുകയായിരുന്നു. സമീപത്തെ ഒറ്റപ്പെട്ട സ്ഥലത്ത് കൊണ്ടുപോയാണ് ഇയാള് കുട്ടിയെ പീഡിപ്പിച്ചത്. പുലര്ച്ചയോടെ കുട്ടിയെ കാണ്മാനില്ലെന്ന് മനസിലാക്കിയ വീട്ടുകാര് ബഹളം കൂട്ടുകയും സമീപ പ്രദേശങ്ങളില് തിരച്ചില് നടത്തുകയുമായിരുന്നു. നായകള് കുരയ്ക്കുന്നത് ശ്രദ്ധിച്ച് പിന്തുടര്ന്ന കുട്ടിയുടെ മുത്തശ്ശിയാണ് കുഞ്ഞിനെ ഒരാള് വലിച്ചെറിഞ്ഞ ശേഷം ഓടിയകലുന്നത് കണ്ടത്. തുടര്ന്ന് കുട്ടിയെ സമീപത്തെ ആശുപത്രിയില് എത്തിച്ചുവെങ്കിലും ജീവന് രക്ഷിക്കുവാനായില്ല. അതേസമയം ക്രൂരകൃത്യത്തിന് ശേഷം ഓടിപ്പോയ ആദേഷ് പാട്ടീല് സ്വന്തം വീട്ടിലെത്തി ഉറങ്ങുകയായിരുന്നു. പൊലീസ് ഇയാളെ വീട്ടിലെത്തിയാണ് കസ്റ്റഡിയിലെടുത്തത്.