വയനാട് / കല്പ്പറ്റ : മധ്യവയസ്ക്കനെ ദുരൂഹ സാഹചര്യത്തില് രണ്ടാം ഭാര്യയുടെ വീട്ടില് മരിച്ച നിലയില് കണ്ടെത്തിയ സംഭവം കൊലപാതകം. രണ്ടാം ഭാര്യയും സഹോദരനും അറസ്റ്റില്. മലപ്പുറം കരിപ്പൂര് സ്വദേശി കിളിനാട്ട് അബ്ദുല് ലത്തീഫി (48) ന്റെ മരണമാണ് കൊലപാതകമെന്ന് പോസ്റ്റുമോര്ട്ടത്തില് തെളിഞ്ഞത്. ഭാര്യ പറളിക്കുന്ന് വടത്തൊടിക ജസ്ന (29), സഹോദരന് ജംഷാദ് (26) എന്നിവരെ പോലീസ് അറസ്റ്റ് ചെയ്തു. വയനാട് മുട്ടില് പറളിക്കുന്നിലെ ഭാര്യ വീട്ടില് തിങ്കളാഴ്ച പുലര്ച്ചെ മരിച്ച നിലയില് കണ്ടത്. ഞായറാഴ്ച രാത്രി വീട്ടില് നിന്ന് ഒച്ചപ്പാട് കേട്ടിരുന്നു. തുടര്ന്ന് നാട്ടുകാര് പോയി നോക്കിയപ്പോഴാണ് അബ്ദുല് ലത്തീഫിനെ ചലനമില്ലാത്ത നിലയില് കണ്ടത്. കല്പ്പറ്റ പോലീസ് എത്തി അബ്ദുല് ലത്തീഫിനെ കല്പ്പറ്റ ജനറല് ആശുപത്രിയില് എത്തിച്ചുവെങ്കിലും ജീവന് രക്ഷിക്കാന് കഴിഞ്ഞില്ല.
അബ്ദുള് ലത്തീഫിന്റെ ശരീരത്തില് പരിക്കുകളുണ്ടായിരുന്നു. മര്ദനമേറ്റ് മരിച്ചുവെന്ന് പോസ്റ്റ്മോര്ട്ടം ചെയ്ത ഡോക്ടറുടെ പ്രാഥമിക നിഗമനം. അബ്ദുല് ലത്തീഫിന്റെ വാരിയെല്ലുകള് ഒടിഞ്ഞിരുന്നു. സംഭവത്തില് കൂടുതല് പ്രതികളുണ്ടോയെന്ന് അന്വേഷിക്കുമെന്ന് പോലീസ് പറഞ്ഞു. മുമ്പ് അബ്ദുല് ലത്തീഫും രണ്ടാംഭാര്യയും തമ്മില് പ്രശ്നങ്ങളുണ്ടായിരുന്നതായി പോലീസിന് സൂചന ലഭിച്ചിട്ടുണ്ട്. അബ്ദുല് ലത്തീഫ് രണ്ടാം ഭാര്യക്ക് പണം കൊടുത്തിരുന്നുവെന്നും വിവാഹ മോചനത്തിന്റെ വക്കിലേക്ക് നീങ്ങുന്ന ഘട്ടത്തില് പണം തിരികെ ചോദിച്ചതിനെ തുടര്ന്ന് പ്രശ്നങ്ങളുണ്ടായിയെന്നുമുള്ള സൂചനകളുണ്ട്.
ഇതിനിടെ ഭാര്യ വീട്ടിലെത്തി അതിക്രമം കാണിച്ച അബ്ദുല് ലത്തിഫ് അലമാരയില് തലയടിച്ച് വീണാണ് മരണം സംഭവിച്ചതെന്നാണ് ജസ്നയുടെ കുടുംബാംഗങ്ങളുടെ വാദം.