തിരുവനന്തപുരം : മലപ്പുറം കലക്ടര്‍ക്കും ജില്ലാ പോലീസ് മേധാവിക്കും കോവിഡ് സ്ഥിരീകരിച്ച സാഹചര്യത്തില്‍ ഡി.ജി.പി ലോക്നാഥ് ബെഹ്റ സ്വയം നിരീക്ഷണത്തില്‍ പ്രവേശിച്ചു. കോവിഡ് മുന്‍കരുതലിന്‍റെ ഭാഗമായാണ് ബെഹ്റയുെട തീരുമാനം.
വ്യാഴാഴ്ച‍യാണ് മലപ്പുറം എസ്.പി യു. അബ്ദുല്‍ കരീമിന് കോവിഡ് ബാധ സ്ഥിരീകരിച്ചത്. മലപ്പുറം കലക്ടര്‍ കെ. ഗോപാലകൃഷ്ണന്‍, സബ് കലക്ടര്‍, അസിസ്റ്റന്‍റ് കലക്ടര്‍, എ.എസ്.പി, ഗണ്‍മാന്മാര്‍ എന്നിവര്‍ അടക്കം 22 പേര്‍ക്ക് കൂടി ഇന്ന് വൈറസ് ബാധ സ്ഥിരീകരിച്ചിരുന്നു.
മഞ്ചേരി ഗവ. മെഡിക്കല്‍ കോളജില്‍ നടത്തിയ സ്രവ പരിശോധനയിലാണ് ഇവര്‍ക്ക് രോഗം സ്ഥിരീകരിച്ചത്. വിമാന ദുരന്തമുണ്ടായപ്പോള്‍ ഇവരെല്ലാം കരിപ്പൂരിലെത്തുകയും രക്ഷാപ്രവര്‍ത്തകരുമായും മറ്റും ഇടപഴകുകയും ചെയ്തതിരുന്നു.
കരിപ്പൂരില്‍ വിമാന ദുരന്തം നടന്ന ദിവസങ്ങളില്‍ രക്ഷാപ്രവര്‍ത്തനത്തില്‍ പങ്കെടുത്തതിന് ശേഷം കലക്ടര്‍ ക്വാറന്‍റീനില്‍ പോയിരുന്നു.