തിരുവനന്തപുരം : കൊറോണ വൈറസ് ബാധയുള്ള വിവരം മറച്ചുവെച്ച് അബുദാബിയില്‍ നിന്നും കേരളത്തില്‍ എത്തിയവര്‍ക്കെതിരെ കേസ്. കൊല്ലം സ്വദേശികളും സുഹൃത്തുക്കളുമായ മൂന്ന് പേര്‍ക്കെതിരയാണ് പോലീസ് കേസ് എടുത്തത്. ശനിയാഴ്ച തിരുവനന്തപുരത്ത് എത്തിയ വിമാനത്തിലാണ് മൂന്ന് പേരും ഉണ്ടായിരുന്നത്.
രോഗവിവരം മറച്ചുവെച്ച് വിമാനത്തില്‍ തിരുവനന്തപുരത്ത് എത്തിയ ഇവര്‍ വിമാനത്താവളത്തില്‍ വെച്ചു നടത്തിയ പരിശോധനയിലും രോഗവിവരം അധികൃതരെ അറിയിച്ചിരുന്നില്ലെന്ന് പോലീസ് പറഞ്ഞു. പിന്നീട് ഇവിടെ നിന്നും ബസ്സില്‍ കൊട്ടാക്കരവരെ യാത്ര ചെയ്തു. യാത്രക്കിടയില്‍ ഇവരുടെ സംസാരത്തില്‍ സംശയം തോന്നിയ യാത്രക്കാരനാണ് വിവരം പോലീസിനെ അറിയിച്ചത്. പോലീസ് എത്തി ചോദ്യം ചെയ്തതോടെയാണ് മൂന്ന് പേരും രോഗവിവരം അറിയിച്ചത്.
തുടര്‍ന്ന് ഇന്നലെ നടത്തിയ പരിശോധനയില്‍ ഇവര്‍ക്ക് രോഗം ഉള്ളതായി കണ്ടെത്തി. ഇവര്‍ക്ക് പുറമേ ഇവര്‍ക്കൊപ്പം യാത്ര ചെയ്തിരുന്ന മറ്റ് അഞ്ച് പേര്‍ക്കും രോഗബാധ സ്ഥിരീകരിച്ചിട്ടുണ്ട്.