തിരുവനന്തപുരം: വിദേശരാജ്യങ്ങളില്‍ നിന്ന് തിരികെയെത്തുന്ന പ്രവാസികള്‍ക്കായി സാധ്യമായ സൗകര്യങ്ങളെല്ലാം ഒരുക്കിയെന്ന് മുഖ്യമന്ത്രി പിണറായി വിജയന്‍. വിമാനങ്ങള്‍ മടങ്ങിയെത്തുമ്ബോള്‍ ആവശ്യമായ ഒരുക്കം വിലയിരുത്തി കേന്ദ്ര സിവില്‍ ഏവിയേഷന്‍ സെക്രട്ടറി സംസ്ഥാന ചീഫ് സെക്രട്ടറിയെ അഭിനന്ദനം അറിയിച്ചിട്ടുണ്ട്.
വ്യാഴാഴ്ച ഗള്‍ഫ് രാജ്യങ്ങളില്‍നിന്ന് രണ്ട് വിമാനങ്ങളാണ് കേരളത്തിലെത്തിയത്. കൊച്ചിയിലെത്തിയ യാത്രികരില്‍ അഞ്ചുപേര്‍ കളമശേരി മെഡിക്കല്‍ കോളജില്‍ ഐസൊലേഷനിലാണ്. വെള്ളിയാഴ്ച റിയാദില്‍നിന്ന് രാത്രി 8.30ന് വിമാനം കരിപ്പൂരിലെത്തും. 13 ജില്ലകളില്‍നിന്നുള്ള 139 പേരും കര്‍ണാടക-തമിഴ്നാട് സ്വദേശികളായ 10 പേരും ഇതിലുണ്ടാകും.
യാത്രക്കാരില്‍ 84 ഗര്‍ഭിണികളും 22 കുട്ടികളുമുണ്ട്. 70ന് മുകളിലുള്ള മൂന്ന് പേരുണ്ട്. ഞായറാഴ്ച ദോഹയില്‍നിന്നുള്ള വിമാനം തിരുവനന്തപുരത്തെത്തും. ആവശ്യമായ ക്രമീകരണം ഏര്‍പ്പെടുത്തിയിട്ടുണ്ട്.
ക്വാറന്‍റീനില്‍ കഴിയുന്നവരും വീട്ടിലേക്ക് മടങ്ങിയവരും ശാരീരിക അകലം കൃത്യമായി പാലിക്കണം. ഇതിന് പ്രത്യേക ശ്രദ്ധ വേണം. സന്ദര്‍ശനം നടത്തുന്ന പതിവ് രീതി പാടില്ല. നാം ഇക്കാര്യത്തില്‍ പുലര്‍ത്തുന്ന ജാഗ്രതയാണ് നാടിനെ സംരക്ഷിച്ചു നിര്‍ത്തുക എന്ന ബോധ്യം എല്ലാവര്‍ക്കും വേണ്ടതുണ്ടെന്നും മുഖ്യമന്ത്രി പറഞ്ഞു.