തിരുവനന്തപുരം : സംസ്ഥാനത്ത് ബാര്‍ബര്‍ ഷോപ്പുകള്‍ തുറക്കേണ്ടെന്ന് തീരുമാനം. മുഖ്യമന്ത്രിയുടെ അധ്യക്ഷതയില്‍ ചേര്‍ന്ന ഉന്നത തല യോഗത്തിലാണ് തീരുമാനം. കേന്ദ്രമാര്‍ഗ്ഗ നിര്‍ദ്ദേശത്തില്‍ ബാര്‍ബര്‍ ഷോപ്പുകള്‍ തുറന്ന് പ്രവര്‍ത്തിക്കാന്‍ അനുമതി ഉണ്ട്. എന്നാല്‍ സംസ്ഥാനത്ത് ബാര്‍ബര്‍ ഷോപ്പുകള്‍ തല്‍ക്കാലം തുറക്കേണ്ടെന്നാണ് തീരുമാനം.
ഗ്രീന്‍ സോണില്‍ പൊതുഗതാഗതം ആകാമെന്ന് നിര്‍ദ്ദേശമുണ്ടെങ്കിലും സംസ്ഥാനത്ത് ബസ് സര്‍വ്വീസ് തല്‍ക്കാലം വേണ്ടെന്നാണ് തീരുമാനം. പകുതി യാത്രക്കാരുമായി സര്‍വ്വീസ് നടത്തുന്നത് വലിയ സാമ്പത്തിക നഷ്ടം ഉണ്ടാക്കുമെന്നതിനാലാണ് തീരുമാനം. കൂടാതെ മദ്യവില്‍പ്പന ശാലകളും താല്‍ക്കാലം തുറക്കേണ്ടെന്ന് തീരുമാനിച്ചു. അനിയന്ത്രിതമായി തിരക്കുണ്ടാകുമെന്ന് കണ്ടാണ് മദ്യ ശാലകള്‍ തുറക്കേണ്ടെന്ന തീരുമാനം സര്‍ക്കാര്‍ കൈക്കൊണ്ടത്.
സംസ്ഥാനത്ത് ആലപ്പുഴ ജില്ലയും തൃശൂരും ഗ്രീന്‍ സോണിലായേക്കും. രണ്ട് ജില്ലകളിലും കഴിഞ്ഞ 21 ദിവസവും പുതിയ കേസുകള്‍ റിപ്പോര്‍ട്ട് ചെയ്തിട്ടില്ല. കേന്ദ്രവുമായി കൂടിയാലോചിച്ച് ഈ രണ്ട് ജില്ലകളേയും ഗ്രീന്‍ സോണാക്കി പ്രഖ്യാപിച്ചേക്കുമെന്നും റിപ്പോര്‍ട്ട് ഉണ്ട്.