തിരുവനന്തപുരം: സംസ്ഥാനത്ത് രണ്ട് പഞ്ചായത്തുകളെക്കൂടി ഹോട്ട്സ്പോട്ട് പട്ടികയില്‍ ഉള്‍പ്പെടുത്തി. ഇടുക്കിയിലെ വണ്ടിപ്പെരിയാര്‍, കാസര്‍കോട് ജില്ലയിലെ അജാനൂര്‍ എന്നീ പഞ്ചായത്തുകളെയാണ് പുതിയതായി ഹോട്ട്സ്പോട്ട് പട്ടികയില്‍ ഉള്‍പ്പെടുത്തിയത്. ഇതോടെ സംസ്ഥാനത്തെ ഹോട്ട്‌സ്‌പോട്ടുകളുടെ എണ്ണം 102 ആയി.
സംസ്ഥാനത്തെ ഏറ്റവും കൂടുതല്‍ ഹോട്ട്‌സ്‌പോട്ടുകള്‍ ഉള്ളത് കണ്ണൂര്‍ ജില്ലയിലാണ്. 28 ഹോട്ട്‌സ്‌പോട്ടുകള്‍ കണ്ണൂര്‍ ജില്ലയിലാണ്. ഇവിടെ 47 പേര്‍ രോഗം ബാധിച്ച് ചികിത്സയിലാണ്. ഇടുക്കിയില്‍ 15 ഹോട്ട്‌സ്‌പോട്ടുകളാണ് ഉള്ളത്. ഇവിടെ 14 പേര്‍ക്ക് രോഗബാധ സ്ഥിരീകരിക്കുകയും ചികിത്സയിലുമാണ്.
കോട്ടയം 18, കൊല്ലം 15, കാസര്‍കോട് 13, തിരുവനന്തപുരം 2, പത്തനംതിട്ട 2, എറണാകുളം 1, പാലക്കാട് 6, മലപ്പുറം 1, കോഴിക്കോട് 5 എന്നിങ്ങനെയാണ് മറ്റ് ജില്ലകളില്‍ ചികിത്സിയിലുള്ളത്.
തൃശൂര്‍, ആലപ്പുഴ, വയനാട് ജില്ലകളില്‍ കൊറോണ വൈറസ് ബാധിതരില്ല. സംസ്ഥാനത്ത് ഇന്ന് പത്ത് പേര്‍ക്ക് കൂടി കൊറോണ വൈറസ് ബാധ സ്ഥിരീകരിച്ചു.