കൊല്ലം : കൊല്ലം അതിര്ത്തിയില് അതീവ ജാഗ്രത. അതിര്ത്തിക്കപ്പുറമുള്ള തമിഴ്നാട് ജില്ലകളില് രോഗം വ്യാപിക്കുന്ന സാഹചര്യത്തിലാണ് കിഴക്കന് മേഖലയില് ജാഗ്രത കര്ശനമാക്കിയത്. വനത്തിലൂടെയും ചെക്ക് പോസ്റ്റില് ഉദ്യോഗസ്ഥരെ കബളിപ്പിച്ചും പലരും അതിര്ത്തി കടന്ന് കേരളത്തിലെത്തുന്നത് പതിവായിരിക്കുകയാണ്.
കഴിഞ്ഞ ആഴ്ച്ച അതിര്ത്തി പ്രദേശമായ കുളത്തൂപ്പുഴയില് നിന്നും തമിഴ്നാട്ടിലെ പുളിയാന്കുടിയിലെ മരണാന്തര ചടങ്ങില് പോയി മടങ്ങി വന്ന യുവാവിന് കൊറോണ സ്ഥിരീകരിച്ചതോടെ പ്രദേശമാകെ കൊറോണ ഭീതിയിലാണ്. ഇയാള് നേരിട്ട് 15 ഓളം പേരുമായി സമ്പര്ക്കം പുലര്ത്തിയിരുന്നെന്നാണ് പ്രാഥമിക വിവരം. ഇവരുടെ സാമ്പിളുകള് പരിശോധനയ്ക്ക് അയച്ചിട്ടുണ്ട്.
തെങ്കാശിയില് ഇതുവരെ 31 പേര്ക്കാണ് രോഗബാധ സ്ഥിരീകരിച്ചത്. അതില് ഏറ്റവും അധികം പോസിറ്റീവ് കേസുകള് ഉള്ളത് പുളിയാന്കുടിയിലാണ്. പുളിയാന്കുടിയില് സമൂഹ വ്യാപനം ഉണ്ടായെന്ന് തമിഴ്നാട് ആരോഗ്യ വകുപ്പും സ്ഥിരീകരിച്ചിരുന്നു. പുളിയാന്കുടിയുമായി അതിര്ത്തി പങ്കിടുന്ന സ്ഥലമാണ് ആര്യങ്കാവ്. തെന്മല, ആര്യങ്കാവ്, കുളത്തൂപ്പുഴ പഞ്ചായത്തുകളില് സമ്പൂര്ണ ലോക്ക് പ്രഖ്യാപിച്ചിരിക്കുകയാണ്.