കൊല്ലം : കൊല്ലം കുളത്തൂപ്പുഴയില്‍ പഞ്ചായത്ത് അതിര്‍ത്തികള്‍ അടച്ചു. കൊറോണ വൈറസ് വ്യാപിക്കുന്ന തമിഴ്‌നാട്ടിലെ പുളിയന്‍ കുടിയില്‍ നിന്നും ഒരാള്‍ കുളത്തൂപ്പുഴയില്‍ എത്തിയതിനെ തുടര്‍ന്നാണ് നടപടി. ഇയാളെ ആരോഗ്യ വകുപ്പ് നിരീക്ഷണത്തിലാക്കി.
ഏപ്രില്‍ 3 നാണ് പുളിയാന്‍കുടിയില്‍ നിന്നും എത്തിയത്. എന്നാല്‍ രണ്ടു ദിവസങ്ങള്‍ക്ക് മുന്‍പാണ് ഇയാള്‍ പുളിയാന്‍ കുടിയില്‍ പോയിരുന്നു എന്ന വിവരം ആരോഗ്യ വകുപ്പിന് ലഭിച്ചത്. ഇയാളുടെ സാമ്പിളുകള്‍ പരിശോധനയ്ക്ക് അയച്ചിട്ടുണ്ട്.
തമിഴ്‌നാട്ടില്‍ നിന്നും കാട്ടിലൂടെ നിരവധി ആളുകള്‍ കേരളത്തിലേക്ക് കടക്കാന്‍ ശ്രമിക്കുന്നുണ്ട്. ഈ സാഹചര്യത്തിലാണ് പഞ്ചായത്ത് അതിര്‍ത്തികളടക്കം അടച്ച് നിയന്ത്രണങ്ങള്‍ കര്‍ശനമാക്കിയിരിക്കുന്നത്. സര്‍ക്കാര്‍ വാഹനങ്ങള്‍ മാത്രമാണ് ഇപ്പോള്‍ ഇതുവഴി കടത്തി വിടുന്നത്.
മന്ത്രി കെ രാജുവിന്റെ നേതൃത്വത്തില്‍ കൊറോണ പ്രതിരോധ നടപടികള്‍ ചര്‍ച്ച ചെയ്യാന്‍ ഇന്ന് യോഗം ചേര്‍ന്നിരുന്നു. പുളിയാന്‍ കുടിയില്‍ 23 പേര്‍ക്കാണ് ഇതുവരെ രോഗബാധ സ്ഥിരീകരിച്ചിരിക്കുന്നത്.