തൃശൂര്‍: സംസ്ഥാന സര്‍ക്കാരിന്റെ പ്ലാസ്റ്റിക് നിരോധനത്തിന് പുല്ലുവില കല്‍പ്പിച്ച്‌ ഓണ്‍ലൈന്‍ ഭക്ഷണ വിതരണക്കാര്‍. ഒറ്റത്തവണ ഉപയോഗിക്കാവുന്ന പ്ലാസ്റ്റിക്കിന് നിരോധനം ഏര്‍പ്പെടുത്തിക്കൊണ്ടുള്ള ഉത്തരവ് പുറത്തുവന്ന് രണ്ട് മാസമായിട്ടും സംസ്ഥാനത്തെ ഹോട്ടലുകള്‍ ഇതുവരെ പൂര്‍ണമായും പ്ലാസ്റ്റിക് മുക്തമായിട്ടില്ല.
സംസ്ഥാനത്ത് ഓണ്‍ലൈന്‍ ഭക്ഷണ വിതരണം തകൃതിയായി നടക്കുകയാണ് . ഭക്ഷണം ചെറുതായാലും വലുതായാലും ഓണ്‍ലൈനില്‍ ആവശ്യപ്പെട്ടാല്‍ അത് പ്ലാസ്റ്റിക്കില്‍ തന്നെ പൊതിഞ്ഞാണ് അയക്കുക. പ്ലാസ്റ്റിക് നിരോധനം നടപ്പാക്കേണ്ടവര്‍ ഓണ്‍ലൈന്‍ ഭക്ഷണ വിതരണക്കാരുടെ ഈ നിയമലംഘനത്തിനെതിരെ ഒരു നടപടിയും സ്വീകരിക്കുന്നില്ല . ഓണ്‍ലൈന്‍ വിതരണക്കാര്‍ മാത്രമല്ല, സംസ്ഥാനത്തെ ചില ഹോട്ടലുകളും പ്ലാസ്റ്റിക്കിനെ ഒഴിവാക്കാന്‍ തയ്യാറായിട്ടില്ല. പ്ലാസ്റ്റിക്കിന് പകരമുള്ള സാമഗ്രികള്‍ ഉപയോഗിച്ചാല്‍ ലാഭത്തേക്കാള്‍ കൂടുതല്‍ നഷ്ടം മാത്രമേ ഉണ്ടാവുകയുള്ളുവെന്നാണ് വിതരണക്കാര്‍ പറയുന്നത്.