കൊച്ചി: സ്കൂള് അധികൃതരുടെ ഭാഗത്തു നിന്നുള്ള അനാസ്ഥയെ തുടര്ന്ന് കൊച്ചിയില് 29 വിദ്യാര്ഥികള്ക്ക് സി.ബി.എസ്.ഇ പത്താംക്ലാസ് പരീക്ഷ എഴുതാനാവില്ലെന്ന് പരാതി. തോപ്പുംപടി ലിറ്റില് അരൂജാസ് ലിറ്റില് സ്റ്റാര്സ് സ്കൂളിലെ വിദ്യാര്ഥികളാണ് പരീക്ഷ എഴുതാന് സാധിക്കാതെ പ്രതിസന്ധിയിലായിരിക്കുന്നത്. രജിസ്ട്രേഷന് അനുമതി ലഭിച്ചിട്ടില്ലെന്നാണ് സ്കൂള് അധികൃതര് വ്യക്തമാക്കുന്നത്.
സ്കൂള് അധികൃതരുടെ ഭാഗത്തു നിന്നുള്ള വീഴ്ചയാണ് കുട്ടികളുടെ ഭാവി അവതാളത്തിലാവാന് കാരണമെന്ന് ആരോപിച്ച് രക്ഷിതാക്കളും വിദ്യാര്ഥികളും സ്കൂള് കവാടം ഉപരോധിക്കുകയാണ്.
സ്കൂളിന് അംഗീകാരമില്ലാത്ത കാര്യം അധികൃതര് മറച്ചു വെക്കുകയായിരുന്നെന്ന് രക്ഷിതാക്കള് ആരോപിച്ചു. ഹാള് ടിക്കറ്റ് തരാനായി രക്ഷിതാക്കളെ കൂടി വിളിച്ചു വരുത്തിയ ശേഷമാണ് പരീക്ഷയെഴുതാന് കഴിയില്ലെന്ന് പറയുന്നത്. വിദ്യാര്ഥികള്ക്ക് ഒരു വര്ഷം നഷ്ടമാകുന്ന അവസ്ഥയാണുള്ളതെന്നും രക്ഷിതാക്കള് പറഞ്ഞു