തിരുവനന്തപുരം: കോയമ്പത്തൂർ അവിനാശിയിൽ ബാംഗ്ലൂരിൽനിന്നു എറണാകുളത്തേക്കുവരികയായിരുന്ന കെ എസ് ആർ ടി സി എ സി വോൾവോ ബസും കണ്ടെയ്നർ ലോറിയും കൂട്ടിയിടിച്ച്‌ 20 പേര്‍ മരിച്ച സംഭവത്തില്‍ മുഖ്യമന്ത്രി പിണറായി വിജയന്‍ അനുശോചനം രേഖപ്പെടുത്തി.
മൃതദേഹങ്ങള്‍ വേഗം നാട്ടില്‍ എത്തിക്കാനും പരിക്കേറ്റവര്‍ക്ക് അടിയന്തര വൈദ്യസഹായം നല്‍കാനും നടപടി സ്വീകരിക്കാന്‍ പാലക്കാട് ജില്ല കലക്ടര്‍ക്ക് മുഖ്യമന്ത്രി നിര്‍ദേശം നല്‍കി.
ചികിത്സക്ക് ക്രമീകരണമൊരുക്കിയിട്ടുണ്ട്. പരിക്കേറ്റവരെ കോയമ്ബത്തൂരേക്ക് കൊണ്ടുവരും. ആവശ്യമെങ്കില്‍ മെഡിക്കല്‍ സംഘത്തെ അയക്കും. ചീഫ് സെക്രട്ടറിക്കാണ് ഏകോപന ചുമതല. ഗതാഗത മന്ത്രി എ.കെ ശശീന്ദ്രനും പാലക്കാട് കലക്ടറും അവിനാശിയിലുണ്ടാകുമെന്നും മുഖ്യമന്ത്രി അറിയിച്ചു. അപകടത്തില്‍ മരിച്ചവരുടെ കുടുംബങ്ങളെ അനുശോചനം അറിയിക്കുന്നതായി മുഖ്യമന്ത്രി പറഞ്ഞു. മരിച്ചവരെ തിരിച്ചറിയാനുള്ള നടപടി പുരോഗമിക്കുകയാണ്. തമിഴ്നാട് സര്‍ക്കാരുമായും തിരുപ്പൂര്‍ ജില്ല കലക്ടറുമായും സഹകരിച്ച്‌ സാധ്യമായ എല്ലാ ആശ്വാസ നടപടികളും കൈക്കൊള്ളുമെന്നും മുഖ്യമന്ത്രി പിണറായി വിജയന്‍ വ്യക്തമാക്കി.
അപകടത്തില്‍പ്പെട്ടവര്‍ക്ക് എല്ലാ സഹായവും അടിയന്തിരമായി എത്തിക്കണമെന്നു പ്രതിപക്ഷ നേതാവ് രമേശ് ചെന്നിത്തല കേരള, തമിഴ്നാട് സര്‍ക്കാറുകളോട് ആവശ്യപ്പെട്ടു. സംഭവത്തില്‍ പ്രതിപക്ഷ നേതാവ് ദുഃഖം രേഖപ്പെടുത്തി. പരിക്കേറ്റവര്‍ക്കു മെച്ചപ്പെട്ട ചികിത്സ ലഭ്യമാക്കണം. മരിച്ചവരെ വേഗത്തില്‍ തിരിച്ചറിയാനുള്ള ഏര്‍പ്പാടുകള്‍ ചെയ്തു മൃതദേഹങ്ങള്‍ നാട്ടില്‍ എത്തിക്കണം. ബന്ധുക്കള്‍ക്കും ആവശ്യമായ സഹായം നല്‍കണം. കേരള, തമിഴ്നാട് സര്‍ക്കാരുകള്‍ ഒത്തൊരുമിച്ച്‌ പ്രവര്‍ത്തിക്കണം. കേരളത്തില്‍ നിന്ന് ഉദ്യോഗസ്ഥരെയും മെഡിക്കല്‍ സംഘത്തെയും അയക്കണമെന്നും രമേശ് ചെന്നിത്തല ആവശ്യപ്പെട്ടു.
