കൊട്ടാരക്കര: കൊല്ലം റൂറൽ പോലീസ് ജില്ലയുടെ പരിധിയിൽ പ്രവർത്തിച്ചു വരുന്ന എല്ലാ റെസിഡന്റ്സ് അസോസിയേഷനുകളേയും ഉൾകൊള്ളിച്ചു കൊണ്ടുള്ള RA-CE (Residents Association – Co ordination and Engagement ) എന്ന പുതിയ കൂട്ടായ്മ രൂപീകരിച്ചു. കൊട്ടാരക്കര എം.എൽ.എ ഐഷാപോറ്റി ഉദ്ഘാടനം നിർവ്വഹിച്ചു. കൊല്ലം റൂറൽ ജില്ലാ പോലീസ് മേധാവി ഹരിശങ്കർ ഐപിഎസ് ന്റെ നേതൃത്വത്തിലാണ് എല്ലാ റെസിഡന്റ്സ് അസോസിയേഷൻ പ്രതിനിധികളെയും ഉൾകൊള്ളിച്ചു കൊണ്ട് RA-CE എന്ന കൂട്ടായ്മ രൂപീകരിച്ചത്. കൊട്ടാരക്കര അമ്പലക്കര റീജൻസി ഹോട്ടലിൽ വച്ച് നടന്ന ചടങ്ങിൽ കൊല്ലം റൂറൽ ജില്ലാ സ്പെഷ്യൽ ബ്രാഞ്ച് ഡിവൈഎസ്പി. ബി. വിനോദ് സ്വാഗതമരുളിയ ചടങ്ങിൽ, കൊട്ടാരക്കര ഡിവൈഎസ്പി ശ്രീ. നാസറുദ്ദീൻ, പുനലൂർ ഡിവൈഎസ്പി ശ്രീ.അനിൽദാസ് എന്നിവർ ആശംസകൾ അറിയിച്ചു. പൊതുജനങ്ങൾക്ക് പോലീസുമായുള്ള സഹകരണം, മുതിർന്ന പൗരന്മാരുടെ സംരക്ഷണം, വിവരങ്ങളുടെയും പ്രതികളുടെയും ശേഖരണം, സംയുക്ത പട്രോളിങ്, കൂടുതൽ സി സി ടി വി ക്യാമറകൾ സ്ഥാപിക്കൽ എന്നിവ പുതിയതായി രൂപീകരിക്കുന്ന കൂട്ടായ്മയിലൂടെ ലക്ഷ്യം വയ്ക്കുന്നതായും, പരാതി അദാലത്ത്, റോഡ് സുരക്ഷാ ബോധവൽക്കരണം, വൈറ്റ് കോളർ കുറ്റകൃത്യങ്ങളെ പറ്റിയുള്ള ക്ലാസുകൾ എന്നിവ ഉണ്ടായിരിക്കുന്നതായും പദ്ധതി വിശദീകരിച്ച് കൊണ്ട് ജില്ലാ പോലീസ് മേധാവി അറിയിച്ചു.
തുടർന്ന് പുതിയ കൂട്ടായ്മയിലേക്ക് ജില്ലാതല പ്രതിനിധികളെ തെരഞ്ഞെടുത്തു. പ്രസ്തുത മീറ്റിംഗിൽ കൊല്ലം റൂറൽ ജില്ലയിലെ പോലീസ് സ്റ്റേഷൻ എസ്എച്ച്ഒ മാരും, വിവിധ റെസിഡന്റ്സ് അസോസിയേഷൻ ഭാരവാഹികളും, പൊതുജനങ്ങളും പങ്കെടുത്തു.