ക്വാര്‍ട്ടര്‍ ഫൈനലില്‍ ഓസ്‌ട്രേലിയയെ ഏകപക്ഷീയമായ ഒരു ഗോളിന് തോല്‍പ്പിച്ച് ഇന്ത്യ ഒളിംപിക്‌സ് വനിതാ ഹോക്കിയുടെ സെമിഫൈനലില്‍ കടന്നു. ഒളിംപിക്‌സ് ഹോക്കിയില്‍ ഇന്ത്യന്‍ വനിതകള്‍ ചരിത്ര നേട്ടം കുറിച്ചു. ക്വാര്‍ട്ടര്‍ ഫൈനലില്‍ ഓസ്‌ട്രേലിയയെ ഏകപക്ഷീയമായ ഒരു ഗോളിന് തോല്‍പ്പിച്ച് ഇന്ത്യ ഒളിംപിക്‌സ് വനിതാ ഹോക്കിയുടെ സെമിഫൈനലില്‍ കടന്നു. ഇന്ത്യന്‍ ഹോക്കിയുടെ ചരിത്രത്തില്‍ ആദ്യമാണ് ഈ നേട്ടം.
ഇരുപത്തി രണ്ടാം മിനുട്ടില്‍ ഗുര്‍ജിത് കൗര്‍ നേടിയ ഗോളാണ് നിര്‍ണ്ണായകമായത്. തോല്‍വി അറിയാതെ ഒളിംപിക്‌സ് ക്വാര്‍ട്ടറില്‍ എത്തിയ ഓസീസിനെയാണ് റാണി റാംപാലിന്റെ നേതൃത്വത്തിലുള്ള ഇന്ത്യന്‍ വനിതകള്‍ അട്ടിമറിച്ചത്. സീഡിംഗില്‍ ഓസ്‌ട്രേലിയ രണ്ടാം സ്ഥാനത്തും ഇന്ത്യ പത്താം സ്ഥാനത്തുമാണ്.
പുരുഷന്മാരുടെ ഹോക്കിയില്‍ നേരത്തേ ഇന്ത്യ സെമിയില്‍ കടന്നിരുന്നു. അതിനു പിന്നാലെയാണ് ഇന്ത്യന്‍ വനിതകളും മികവു തെളിയിക്കുന്നത്. 1980 മോസ്‌ക്കോ ഒളിംപിക്‌സില്‍ ആറു ടീമുകള്‍ മാത്രം പങ്കെടുത്ത ടൂര്‍ണ്ണമെന്റില്‍ നാലാമത് എത്തിയതായിരുന്നു ഇന്ത്യയുടെ ഏറ്റവും വലിയ നേട്ടം. കഴിഞ്ഞ റിയോ ഒളിംപിക്‌സില്‍ പന്ത്രണ്ടു ടീമുകള്‍ പങ്കെടുത്തപ്പോള്‍ ഇന്ത്യന്‍ വനിതകള്‍ ഏറ്റവും അവസാനസ്ഥാനക്കാരായിരുന്നു.