രണ്ടാം പിണറായി സര്‍ക്കാര്‍ രണ്ടുമാസം തികയ്ക്കും മുമ്പേ തുടങ്ങിയതാണ്, സര്‍ക്കാരിലെ മന്ത്രിമാര്‍ക്കെതിരെ ഉയര്‍ന്നു തുടങ്ങിയ ആരോപണങ്ങള്‍. രണ്ടാം പിണറായി സര്‍ക്കാര്‍ രണ്ടുമാസം തികയ്ക്കും മുമ്പേ തുടങ്ങിയതാണ്, സര്‍ക്കാരിലെ മന്ത്രിമാര്‍ക്കെതിരെ ഉയര്‍ന്നു തുടങ്ങിയ ആരോപണങ്ങള്‍. വനം കൊള്ളയില്‍ തുടങ്ങി പീഡന കേസിലെ വിവാദ ഇടപെടല്‍ വഴി പാര്‍ട്ടിക്കുള്ളിലെ തമ്മില്‍ത്തല്ലിലൂടെ കടന്ന് നിയമസഭാ കയ്യാങ്കളിക്കേസിലെ സുപ്രീംകോടതിയുടെ തിരിച്ചടിയില്‍ വരെ എത്തി നില്‍ക്കുകയാണ്, മന്ത്രിമാര്‍ക്കെതിരെ ഒന്നിനു പുറകേ ഒന്നായി വന്ന ആക്ഷേപങ്ങള്‍.
മൃഗീയ ഭൂരിപക്ഷം നേടി അധികാരം നിലനിര്‍ത്തിയ പിണറായി വിജയന്‍ സര്‍ക്കാരില്‍, ആദ്യ പുക കണ്ടത് മരം കൊള്ളയിലാണ്. കഴിഞ്ഞ സര്‍ക്കാരിന്റെ കാലത്താണ് സംഭവിച്ചതെങ്കിലും തുടര്‍ ഭരണമായതിനാല്‍ സര്‍ക്കാരിന് എളുപ്പം തലയൂരാന്‍ കഴിയുന്നതായിരുന്നില്ല കോടികളുടെ മരംകൊള്ള. വിവാദ ഉത്തരവിറക്കി മരക്കടത്തിന് ചൂട്ട് പിടിച്ചത് സിപിഐ ആയിരുന്നു. വനം വകുപ്പ് കഴിഞ്ഞ സര്‍ക്കാരിന്റെ കാലത്ത് ഭരിച്ചിരുന്ന സിപിഐയുടെ കൈയ്യില്‍ നിന്നും മാറ്റിയതിനാല്‍, വലിയൊരു പ്രതിപക്ഷ ആക്രമണത്തിന്റെ സാധ്യതകളില്‍ നിന്നുമാണ് സര്‍ക്കാര്‍ കഷ്ടിച്ച് രക്ഷപ്പെട്ടത്. എന്നാല്‍, സത്യം പുറത്ത് കൊണ്ടുവന്ന ഉദ്യോഗസ്ഥര്‍ക്ക് നേരെ സര്‍ക്കാര്‍ സ്വീകരിച്ചത് പ്രതികാര നടപടികളായിരുന്നു. വനം വകുപ്പ് മന്ത്രി എ കെ ശശീന്ദ്രന്റെ പ്രസ്താവനകളും മുന്നണിയിലെ പ്രമുഖരായ സിപിഐയെ വെട്ടിലാക്കുന്നതായിരുന്നു.
വിവാദനായക പരിവേഷം ഒന്നാം പിണറായി മന്ത്രിസഭയിലും ചാര്‍ത്തപ്പെട്ട മന്ത്രി എ കെ ശശീന്ദ്രന് രണ്ടാമൂഴത്തിലും ചുവടു പിഴച്ചു. സ്വന്തം പാര്‍ട്ടിക്കാരനായ സംസ്ഥാന നേതാവിനെതിരെ ഉയര്‍ന്ന പീഡന പരാതി ഒത്തുതീര്‍പ്പാക്കാന്‍ ശ്രമിച്ചു എന്ന ആരോപണത്തിലാണ് ശശീന്ദ്രന് കുടുങ്ങിയത്. പരാതിക്കാരിയുടെ പിതാവിനെ സ്വാധീനിക്കാന്‍ ശ്രമിച്ചതായാണ് ആരോപണം ഉയര്‍ന്നത്. മന്ത്രിയുടെ ശബ്ദസന്ദേശം അടക്കമുള്ള തെളിവുകള്‍ പുറത്തു വന്നിരുന്നു. വിഷയത്തെ പ്രതിപക്ഷം ശക്തമായ ആയുധമാക്കി. എന്നാല്‍, മന്ത്രിയുടെ ‘വിക്കറ്റെടുക്കണ്ട’ എന്ന നിലപാടാണ് മുഖ്യമന്ത്രി കൈക്കൊണ്ടത്. ഇടപെടലുകളില്‍ രാജിവയ്ക്കത്തക്ക വിധത്തിലുള്ള തെറ്റുകളില്ലെന്ന മുന്നണി നിലപാട് എ കെ ശശീന്ദ്രന് തുണയായി.
ശശീന്ദ്രന് വിഷയത്തിലെ പുകചുരുളുകള്‍ മായും മുന്‍പാണ് ഇടതു മുന്നണിക്കും സര്‍ക്കാരിനും തന്നെ വെല്ലുവിളിയായി ഐഎന്‍എല്ലിലെ ആഭ്യന്തര കലാപം അരങ്ങേറുന്നത്. ഏക എംഎല്‍എ മാത്രമുള്ള പാര്‍ട്ടിക്ക് മന്ത്രിസ്ഥാനം നല്‍കി പരിഗണിച്ചത്, ഇപ്പോള്‍ സര്‍ക്കാരിന് തന്നെ നാണക്കേടുണ്ടാക്കുന്ന സാഹചര്യത്തിലേക്കെത്തി നില്‍ക്കുന്നു. ഐഎന്‍എല്‍ പിളര്‍ന്നതായും മറിച്ചുമുള്ള വാര്‍ത്തകള്‍ പ്രചരിക്കുന്നതിനിടയില്‍, മന്ത്രി സ്ഥാനം പാര്‍ട്ടിയിലെ കലാപത്തില്‍ നഷ്ടമാകുമോ എന്നാണ് ഇനി കണ്ടറിയേണ്ടത്.
നിയമസഭാ കൈയാങ്കളി കേസ് പിന്‍വലിക്കാനാവില്ലെന്ന സുപ്രീംകോടതി വിധി സര്‍ക്കാരിനേല്‍പ്പിച്ച പരിക്ക് നിസാരമല്ല. ഏറെ മാനങ്ങള്‍ വിധിക്ക് കല്‍പിക്കേണ്ടി വരും. വിധിയുടെ ആഘാതം രണ്ടാം പിണറായി സര്‍ക്കാരിലേക്കും പതിച്ചിരിക്കുന്നു. പിണറായി മന്ത്രിസഭയിലെ പൊതു വിദ്യാഭ്യാസ മന്ത്രിയായ വി ശിവന്‍കുട്ടി നിയമസഭാ കൈയാങ്കളി കേസില്‍ വിചാരണ നേരിടേണ്ടി വരും എന്ന് ഉറപ്പായതോടെ പ്രതിപക്ഷം രാജി ആവശ്യവുമായി പ്രതൃക്ഷ സമരത്തിലേക്ക് കടന്നു കഴിഞ്ഞു. പൊതുമുതല്‍ നശിപ്പിച്ച കേസില്‍ പ്രതിയായ ഒരാള്‍ മന്ത്രിസഭയില്‍ തുടരുന്നത് സര്‍ക്കാരിന് കളങ്കമായി മാറുമെന്നാണ് പ്രതിപക്ഷം ആരോപിക്കുന്നത്. ഇത് മുന്നില്‍ കണ്ട് പ്രതിഷേധം ശക്തമാക്കാനാണ് പ്രതിപക്ഷത്തിന്റെ തീരുമാനം.