ന്യൂഡല്‍ഹി: കോവിഡ് പ്രതിരോധത്തിനുളള കൊവിഷീല്‍ഡ് വാക്‌സിനുകള്‍ക്കായി കേന്ദ്രസര്‍ക്കാര്‍ സെറം ഇന്‍സ്റ്റിറ്റ്യൂട്ടിന് പര്‍ച്ചേസ് ഓര്‍ഡര്‍ നല്‍കി. ഈ മാസം 16 മുതല്‍ രാജ്യത്ത് വാക്സിന് വിതരണം ആരംഭിക്കാനിരിക്കെയാണ് നീക്കം. സെറം ഇന്‍സ്റ്റിറ്റ്യൂട്ടാണ് ഇക്കാര്യം അറിയിച്ചത്. വാക്സിന്റെ ഒരു ഡോസിന് 200 രൂപയാണ് വിലയെന്നും സെറം ഇന്‍സ്റ്റിറ്റിയൂട്ട് വ്യക്തമാക്കി.
വാക്സിന്റെ വിപണിവില 1000 രൂപയാണെങ്കിലും കേന്ദ്ര സര്‍ക്കാര്‍ ആദ്യ ഘട്ടത്തില്‍ വാങ്ങുന്ന 10 കോടി ഡോസ് വാക്സിന് 200 രൂപ നിരക്കില്‍ നല്‍കാനാണ് തീരുമാനമെന്ന് സെറം ഇന്‍സ്റ്റിറ്റ്യൂട്ട് സിഇഒ അദാര്‍ പൂനാവാലയും അറിയിച്ചു. ഇന്ത്യയിലേക്ക് വിതരണം ചെയ്യാന്‍ അഞ്ച് കോടി ഡോസ് വാക്സിന് നിലവില്‍ സെറം ഇന്‍സ്റ്റിറ്റ്യൂട്ടിന്റെ നിര്‍മ്മാണ കേന്ദ്രത്തില്‍ സജ്ജമാക്കിയിട്ടുണ്ട്.
തുടക്കത്തില്‍ 11 ലക്ഷം വാക്‌സിനുകളായിരിക്കും നല്‍കുക. കൊവിഷീല്‍ഡിനും കൊവാക്‌സിനുമാണ് രാജ്യത്ത് അടിയന്തിര ഉപയോഗത്തിനുള്ള അനുമതി ഡിസിജിഐ നല്‍കിയിരിക്കുന്നത്. വാക്സിന് വിതരണത്തിന് മുന്നോടിയായുള്ള ഡ്രെെ റണ്ണുകള്‍ രാജ്യത്ത് വിജയകരമായി പൂര്‍ത്തിയാക്കിക്കഴിഞ്ഞു.