മസ്കത്ത്: ക്രിസ്മസ്–പുതുവത്സര അവധിക്കാലം ആഘോഷിക്കാൻ നാട്ടിലേക്ക് തിരിക്കാനൊരുങ്ങുന്ന ഒമാനിലെ പ്രവാസികൾക്ക് ഇരുട്ടടിയായിവിമാന ടിക്കറ്റ് നിരക്കിൽ വൻ വർധന. ഡിസംബർ പത്തിന് ശേഷം കേരളത്തിലേക്കുള്ള ടിക്കറ്റ് നിരക്ക് ഇരട്ടിയിലധികമാണ് വർധിക്കുന്നത്, ഒമാൻ എയർ സർവീസ് മാർച്ച് വരെയുള്ള ശീതകാല ഷെഡ്യൂളിൽനിന്ന് മസ്കത്ത്–കോഴിക്കോട് റൂട്ട് ഒഴിവാക്കിയതും പ്രവാസികൾക്ക് തിരിച്ചടിയായി.
എയർ ഇന്ത്യ എക്സ്പ്രസ് ആഴ്ചയിൽ നാല് ദിവസം മാത്രമാണ് കോഴിക്കോട്ടേക്ക് സർവീസ് നടത്തുന്നത്. വിമാനങ്ങളുടെ ലഭ്യത കുറഞ്ഞതോടെ മറ്റു വിമാനക്കമ്പനികൾ നിരക്ക് കുത്തനെ കൂട്ടിയിരിക്കുകയാണ്. ഇതോടെ, കുറഞ്ഞ വരുമാനക്കാരായ പല പ്രവാസികളും മാസങ്ങളോളം സ്വരുക്കൂട്ടിയ പണം യാത്രയ്ക്കായി മാറ്റിവെക്കേണ്ട അവസ്ഥയിലാണ്. ഡിസംബർ പത്തിന് ശേഷം ഒമാനിൽനിന്ന് കേരളത്തിലേക്കുള്ള വിമാന ടിക്കറ്റ് നിരക്കുകൾ കുത്തനെ ഉയരുന്നുണ്ട്.
തിരുവനന്തപുരം സെക്ടറിലേക്ക് 250 റിയാലിന് മുകളിലാണ് നിരക്ക് കാണിക്കുന്നത്. കോഴിക്കോട്ടേക്ക് 200 റിയാൽ വരെയും, കൊച്ചി, കണ്ണൂർ സെക്ടറുകളിലേക്ക് 160 മുതൽ 200 റിയാൽ വരെയുമാണ് നിരക്കുകൾ. മലബാർ മേഖലയിലുള്ള പ്രവാസികളെയാണ് ഈ പ്രതിസന്ധി ഏറ്റവും രൂക്ഷമായി ബാധിക്കുന്നത്. ഒക്ടോബർ 23 മുതൽ 2027 മാർച്ച് വരെയുള്ള ശീതകാല ഷെഡ്യൂളിൽനിന്ന് ഒമാൻ എയർ മസ്കത്ത്–കോഴിക്കോട് സർവീസ് ഒഴിവാക്കിയത് പ്രവാസികൾക്ക് വലിയ തിരിച്ചടിയായി. തിരക്കേറിയ ഉത്സവ സീസണിൽ കൂടുതൽ സർവീസുകൾ അനുവദിച്ചും ടിക്കറ്റ് നിരക്കുകൾ നിയന്ത്രിച്ചും പ്രവാസികളുടെ യാത്രാദുരിതത്തിന് അടിയന്തര പരിഹാരം കാണണമെന്നാണ് പ്രവാസി സംഘടനകളുടെയും യാത്രക്കാരുടെയും ശക്തമായ ആവശ്യം.
