പൂയപ്പള്ളി : കൊല്ലം ജില്ലയിൽ റെക്കോർഡ് ലഹരിവേട്ട. 403 ഗ്രാം എം.ഡി.എം.എയുമായി മധ്യവയസ്കൻ പൂയപ്പള്ളി പോലീസിന്റെ പിടിയിൽ. പൂയപ്പള്ളി പോലീസ് സ്റ്റേഷൻ പരിധിയിലെ ഓടനാവട്ടത്തുവെച്ചാണ് 403 ഗ്രാം എം.ഡി.എം.എയുമായി പ്രതി പിടിയിലായത്. കുണ്ടറ പെരുമ്പുഴ സ്വദേശിയും ‘പൊടിമോൻ’ എന്നറിയപ്പെടുന്നതുമായ ദുഷ്യന്തൻ (53) ആണ് പോലീസിന്റെ പിടിയിലായത്. ഇയാൾ നിരവധി ക്രിമിനൽ കേസുകളിൽ പ്രതിയാണെന്ന് പോലീസ് അറിയിച്ചു. കൊല്ലം റൂറൽ എസ്.പി. ഷാജി സുഗണന് ലഭിച്ച രഹസ്യവിവരത്തിന്റെ അടിസ്ഥാനത്തിൽ, റൂറൽ ഡാൻസാഫ് (DANSAF) സംഘവും പൂയപ്പള്ളി പോലീസും സംയുക്തമായി നടത്തിയ നീക്കത്തിലാണ് പ്രതി കുടുങ്ങിയത്. കഴിഞ്ഞ ദിവസം അർദ്ധരാത്രിയോടെ ഓടനാവട്ടം പരുത്തിയറയ്ക്ക് സമീപം വെച്ചായിരുന്നു അറസ്റ്റ്. പിടിയിലായ പ്രതിക്ക് ലഹരിമരുന്ന് എത്തിച്ചു നൽകിയവരെയും ഇതിന് പിന്നിൽ പ്രവർത്തിക്കുന്ന മറ്റ് മാഫിയാ കണ്ണികളെയും കുറിച്ച് പോലീസ് അന്വേഷണം വ്യാപിപ്പിച്ചിട്ടുണ്ട്.
