തിരുവനന്തപുരം: കേരളത്തിലെ തീരദേശ ജില്ലകളില് ദേശീയ സമുദ്ര വിവര വിശകലന കേന്ദ്രം റെഡ് അലർട്ട് പ്രഖ്യാപിച്ചു. കേരള തീരത്ത് 20ന് വൈകീട്ട് 5.30 വരെ 1.8 മീറ്റർ വരെ ഉയർന്ന തിരമാലക്കും കള്ളക്കടല് പ്രതിഭാസത്തിനും സാധ്യതയുണ്ടെന്ന മുന്നറിയിപ്പിനെ തുടർന്നാണിത്. തീരമേഖലകളില്, പ്രത്യേകിച്ച് താഴ്ന്ന പ്രദേശങ്ങളില് വെള്ളം കയറാനും കടലാക്രമണത്തിനും സാധ്യതയുണ്ട്.
തിരുവനന്തപുരം കാപ്പില് മുതല് പൊഴിയൂർ വരെ, കൊല്ലം ആലപ്പാട് മുതല് ഇടവ വരെ, ആലപ്പുഴ ചെല്ലാനം മുതല് അഴീക്കല് ജെട്ടി വരെ, എറണാകുളം മുനമ്പം ഫിഷിങ് ഹാർബർ മുതല് മറുവക്കാട് വരെ, തൃശൂർ ആറ്റുപുറം മുതല് കൊടുങ്ങല്ലൂർ വരെ, മലപ്പുറം കടലുണ്ടി നഗരം മുതല് പാലപ്പെട്ടി വരെ, കോഴിക്കോട് ചോമ്പാല ഫിഷിങ് ഹാർബർ മുതല് രാമനാട്ടുകര വരെ, കണ്ണൂർ വളപട്ടണം മുതല് ന്യൂ മാഹി വരെ, കാസർകോട് കുഞ്ചത്തൂർ മുതല് കോട്ടക്കുന്ന് വരെ മത്സ്യത്തൊഴിലാളികളും തീരദേശവാസികളും അതീവ ജാഗ്രത പാലിക്കണം.