കൊട്ടാരക്കര. കെ. എസ്. ആർ. ടി. സി. ബസിടിച്ച് ബൈക്ക് യാത്രികൻ മരണപ്പെട്ടു. ഇന്നലെ രാവിലെ 8.30ന് എം. സി. റോഡിൽ മൈലം മുട്ടമ്പലം റെയിൽവേ പാലത്തിന് സമീപമായിരുന്നു അപകടം. തിരുവനന്തപുരം വള്ളക്കടവ് അത്തേക്കാട്ട് ഹൗസിൽ ഷെയ്ക്ക് മുഹമ്മദ് (57)ആണ് അപകടത്തിൽ പ്പെട്ടത്.
നാഗർ കോവിൽ കളക്ടറേറ്റിലെ ജീവനക്കാരനായിരുന്നു. അവധി ദിവസങ്ങളിൽ പള്ളികളിൽ പുസ്തക വിതരണത്തിലും ഷെയ്ക്ക് മുഹമ്മദ് പോകാറുണ്ടായിരുന്നു. ഇന്നലെ രാവിലെ മറ്റൊരു ബൈക്കിൽ സുഹൃത്തായ സജീറും പുസ്തകം വിതരണം ചെയ്യാൻ എത്തിയിരുന്നു. സജീറിന്റെ ബൈക്കിന്റെ പിറകിലായി സഞ്ചരിച്ചിരുന്ന ഷെയ്ക്ക് മുഹമ്മദിനെ കാണാതായതിനെ തുടർന്ന് നടത്തിയ അന്വേഷണത്തിലാണ് മൈലം മുട്ടമ്പലം പാലത്തിന് സമീപം അപകടത്തിൽപ്പെട്ട ഷെയ്ക്ക് മുഹമ്മദിനെ കണ്ടെത്തിയത്. കൊട്ടാരക്കരയിൽ നിന്നും പമ്പായിലേക്ക് പോയ കെ. എസ്. ആർ. ടി. ബസാണ് ഷെയ്ക്ക് മുഹമ്മദിനെ ഇടിച്ച് വീഴ്ത്തിയത്. കൊട്ടാരക്കര താലൂക്ക് ആശുപത്രിയിൽ പോസ്റ്റ് മോർട്ടത്തിന് ശേഷം മൃതദേഹം ബന്ധുക്കൾക്ക് വിട്ടുകൊടുത്തു. കൊട്ടാരക്കര പോലീസ് കേസെടുത്തു. ഭാര്യ. സബീന. മക്കൾ. ഹസീന, ഹസാന. മരുമക്കൾ. സജാദ്, ഷിജി.