തിരുവനന്തപുരം: ഫിഫ ലോകകപ്പ് മത്സരങ്ങളുടെ ആവേശത്തിനിടയില് ഫുട്ബോള് ആരാധകരെ ലക്ഷ്യമിട്ട് വന് തോതില് സൈബര് തട്ടിപ്പുകള് നടക്കുന്നതായി കേരള സൈബര് പൊലീസ്. ലോകകപ്പ് മത്സരങ്ങള് തത്സമയം സൗജന്യമായി കാണാമെന്ന വ്യാജേന സോഷ്യല് മീഡിയകള് വഴി ലിങ്കുകള് പ്രചരിപ്പിച്ചാണ് തട്ടിപ്പുകാര് ഫോണുകള് ഹാക്ക് ചെയ്യുന്നത്.
ഫേസ്ബുക്ക്, ഇന്സ്റ്റാഗ്രാം, ടെലിഗ്രാം, വാട്സാപ്പ്, യൂട്യൂബ് തുടങ്ങിയ പ്ലാറ്റ്ഫോമുകളിലൂടെ ആകര്ഷകമായ പരസ്യങ്ങള് നല്കിയാണ് ആരാധകരെ കെണിയില് വീഴ്ത്തുന്നത്. ഫിഫ ലോകകപ്പ് ലൈവ് ഫ്രീ, 1000+ ടിവി ചാനലുകള് സൗജന്യം, പ്രീമിയം ഒടിടി ഉള്ളടക്കം ഫ്രീ, പരസ്യങ്ങളില്ലാതെ സിനിമകളും മത്സരങ്ങളും കാണാം തുടങ്ങിയ വാഗ്ദാനങ്ങളാണ് ഇവര് നല്കുന്നത്.
ഈ വ്യാജ ആപ്പുകളെ സൂക്ഷിക്കുക!
ഔദ്യോഗിക ആപ്ലിക്കേഷനുകള് എന്ന് തോന്നിപ്പിക്കുന്ന വിധത്തില് രൂപകല്പ്പന ചെയ്ത ചില വ്യാജ എപികെ ഫയലുകളുടെ ലിങ്കുകളാണ് തട്ടിപ്പുകാര് നല്കുന്നത്. HZ TV, OPEN TV, NB TV, MAX TV, XM TV, TUBI TV എന്നി പേരുകളിലാണ് വ്യാജ ആപ്പുകളെന്ന് സൈബര് പൊലീസ് വ്യക്തമാക്കുന്നു.
ചതിക്കുഴി ഇങ്ങനെ:
1.ലിങ്കുകളില് നിന്നുള്ള ഡൗണ്ലോഡ്
ഉപയോക്താക്കള് സോഷ്യല് മീഡിയയിലെ ലിങ്കുകള് വഴി ഈ വ്യാജ ആപ്ലിക്കേഷനുകള് ഫോണില് ഇന്സ്റ്റാള് ചെയ്യുന്നു.
2. അനുമതികള് നേടിയെടുക്കല്
ഇന്സ്റ്റാള് ചെയ്ത ശേഷം ‘Update Required, Activate Subscription, Enable Service തുടങ്ങിയ വ്യാജ സന്ദേശങ്ങള് സ്ക്രീനില് കാണിക്കും. ഇത് ക്ലിക്ക് ചെയ്യുന്നതോടെ ഫോണിന്റെ നിര്ണായക സുരക്ഷാ സംവിധാനങ്ങളായ Accessibility Service, Screen Overlay, Notification Access എന്നിവയ്ക്കുള്ള അനുമതി തട്ടിപ്പുകാര് കൈക്കലാക്കുന്നു.
3. ഫോണ് നിയന്ത്രണം പൂര്ണമായി നഷ്ടപ്പെടുന്നു
ഈ അനുമതികള് ലഭിക്കുന്നതോടെ ഫോണിന്റെ സുരക്ഷാ സംവിധാനങ്ങള് പൂര്ണമായി തകരുകയും ഉപയോക്താവിന്റെ അറിവോ സമ്മതമോ ഇല്ലാതെ ഫോണിലെ മറ്റ് ആപ്പുകളിലേക്ക് തട്ടിപ്പുകാര്ക്ക് പ്രവേശനം ലഭിക്കുകയും ചെയ്യുന്നു.
4. ബാങ്ക് അക്കൗണ്ടുകള് ചോര്ത്തുന്നു
ഫോണിന്റെ നിയന്ത്രണം പൂര്ണമായി കൈക്കലാക്കുന്ന സൈബര് ക്രിമിനലുകള് നിങ്ങളുടെ ഫോണിലെ യുപിഐ ആപ്ലിക്കേഷനുകള് വഴി ബാങ്ക് അക്കൗണ്ടുകളില് നിന്ന് പണം അനധികൃതമായി തട്ടിയെടുക്കുന്നു.
സുരക്ഷിതമായിരിക്കാന് പൊലീസ് നല്കുന്ന നിര്ദേശങ്ങള്:
ലോകകപ്പ് മത്സരങ്ങള് കാണാന് സോഷ്യല് മീഡിയയിലൂടെ ലഭിക്കുന്ന ലിങ്കുകളോ ഫയലുകളോ യാതൊരു കാരണവശാലും ഇന്സ്റ്റാള് ചെയ്യരുത്. ആപ്ലിക്കേഷനുകള് ഗൂഗിള് പ്ലേ സ്റ്റോര്, ആപ്പിള് ആപ്പ് സ്റ്റോര് എന്നിവയില് നിന്ന് മാത്രം ഡൗണ്ലോഡ് ചെയ്യുക. സോഷ്യല് മീഡിയ പരസ്യങ്ങളിലെ ‘സൗജന്യ’ ഓഫറുകള് വിശ്വസിക്കാതിരിക്കുക. ആപ്പുകള് ഇന്സ്റ്റാള് ചെയ്യുമ്പോള് Accessibility Service, Install Unknown Apps, Screen Control തുടങ്ങിയ നിര്ണായക അനുമതികള് ആവശ്യപ്പെടുന്നുണ്ടെങ്കില് ആ ആപ്പ് ഉടന് ഒഴിവാക്കുക. സംശയസ്പദമായ ഇത്തരം ലിങ്കുകള് സുഹൃത്തുക്കള്ക്കോ ഗ്രൂപ്പുകളിലോ ഫോര്വേഡ് ചെയ്യാതിരിക്കുക.
നിങ്ങള് ഏതെങ്കിലും തരത്തിലുള്ള സൈബര് സാമ്പത്തിക തട്ടിപ്പിന് ഇരയായാല് ഒട്ടും സമയം കളയാതെ 1930 എന്ന സൈബര് ഹെല്പ്പ്ലൈന് നമ്പറിലോ, https://cybercrime.gov.in എന്ന നാഷണല് സൈബര് ക്രൈം റിപ്പോര്ട്ടിങ് പോര്ട്ടലിലോ ഉടന് പരാതി രജിസ്റ്റര് ചെയ്യണമെന്ന് പൊലീസ് അറിയിച്ചു