കോട്ടയം: കോട്ടയം മെഡിക്കല് കോളജ് ആശുപത്രിയില് പ്രസവത്തിനിടെ യുവതി മരിച്ച സംഭവത്തില് ചികിത്സാപ്പിഴവ് ആരോപിച്ചു ബന്ധുക്കള്. ആലപ്പുഴ ഓമനപ്പുഴ പൊള്ളയില് സ്വദേശി അനീഷിന്റെ ഭാര്യ ഫേബ (27) ആണ് മരിച്ചത്. ആശുപത്രി അധികൃതരുടെ ഭാഗത്ത് നിന്നുണ്ടായ അനാസ്ഥയാണ് മരണകാരണമെന്ന് ആരോപിച്ച് ബന്ധുക്കള് പൊലീസിലും ആശുപത്രി സൂപ്രണ്ടിനും പരാതി നല്കി.
ആലപ്പുഴയില് നിന്ന് റഫര് ചെയ്തതിനെ തുടര്ന്നാണ് കഴിഞ്ഞ ശനിയാഴ്ച യുവതിയെ കോട്ടയം മെഡിക്കല് കോളജ് ആശുപത്രായില് പ്രവേശിപ്പിച്ചത്. പ്രസവവേദന അനുഭവപ്പെട്ടതിനെ തുടര്ന്ന് ഇന്നലെ പുലര്ച്ചെ ലേബര് റൂമിലേക്ക് മാറ്റി. ആദ്യ ഘട്ടത്തില് സുഖപ്രസവം നടക്കുമെന്ന് ഡോക്ടര്മാര് അറിയിച്ചിരുന്നെങ്കിലും പിന്നീട് സ്ഥിതി വഷളാവുകയും ശസ്ത്രക്രിയയിലൂടെ കുഞ്ഞിനെ പുറത്തെടുക്കുകയുമായിരുന്നു.
ശസ്ത്രക്രിയയ്ക്ക് പിന്നാലെ യുവതിക്ക് ഹൃദയസ്തംഭനം ഉണ്ടായതായാണ് ഡോക്ടര്മാര് ബന്ധുക്കളെ അറിയിച്ചത്. എന്നാല് ശസ്ത്രക്രിയ നടത്താന് വൈകിയതാണ് മരണത്തിന് കാരണമായതെന്നും ഡോക്ടര്മാരുടെ ഭാഗത്ത് നിന്ന് ഗുരുതരമായ വീഴ്ചയുണ്ടായെന്നും ബന്ധുക്കള് ആരോപിച്ചു. നിലവില് യുവതിയുടെ മൃതദേഹം ചേര്ത്തലയിലെ സ്വകാര്യ ആശുപത്രി മോര്ച്ചറിയില് സൂക്ഷിച്ചിരിക്കുകയാണ്.
സംഭവത്തില് വിശദമായ അന്വേഷണം വേണമെന്നാണ് കുടുംബം ആവശ്യപ്പെട്ടു. പൊലീസിലും ആശുപത്രി സൂപ്രണ്ടിനും ബന്ധുക്കള് പരാതി നല്കി