കൊച്ചി: അടിസ്ഥാന ശമ്പളം 40,000 രൂപയാക്കണമെന്നാവശ്യപ്പെട്ട് സംസ്ഥാനത്തെ സ്വകാര്യ ആശുപത്രികളിലെ നഴ്സുമാര് നടത്തി വരുന്ന സമരത്തില് ആശുപത്രി സേവനങ്ങള് മുടങ്ങിയ സാഹചര്യത്തില് ഹൈക്കോടതിയുടെ ഇടപെടല്.
നഴ്സുമാരുടെ സമരത്തെ തുടര്ന്ന് ആശുപത്രിയിലെ സേവനങ്ങള് മുടങ്ങരുതെന്ന് ഹൈക്കോടതി സര്ക്കാരിന് നിര്ദേശം നല്കി. നഴ്സുമാരുടെ സമരം ആശുപത്രി സേവനങ്ങള് തടസപ്പെടുത്തിയെന്നും എസ്മ (ആവശ്യ സേവന പരിപാലന നിയമം) പ്രയോഗിക്കണമെന്നും പ്രൈവറ്റ് ഹോസ്പിറ്റല് അസോസിയേഷന് നല്കിയ ഹര്ജിയില് ആവശ്യപ്പെട്ടു.
സര്ക്കാരും തൊഴില് വകുപ്പും ആശുപത്രികളിലെ സേവനങ്ങള് മുടങ്ങുന്നില്ലെന്ന് ഉറപ്പാക്കണമെന്നും ആശുപത്രികളില് പൊലീസ് സംരക്ഷണം ഉറപ്പാക്കണമെന്നും കോടതി നിര്ദേശിച്ചു. ജോലി ചെയ്യാന് തയ്യാറാകുന്ന നഴ്സുമാരെ സമരക്കാര് ഭീഷണിപ്പെടുത്തുന്നില്ലെന്ന് ഉറപ്പാക്കണമെന്നും കോടതി നിര്ദേശിച്ചു.