തിരുവനന്തപുരം മുടവൻമുകളിൽ സത്യൻ നഗർ- മുടവൻമുകൾ പാലം മുഖ്യമന്ത്രി പിണറായി വിജയൻ ഉദ്ഘാടനം ചെയ്തു. സംസ്ഥാനത്ത് സമാനതകളില്ലാത്ത വികസനം സാധ്യമാക്കിയത് ഭരണ തുടർച്ചയെന്ന് മുഖ്യമന്ത്രി പറഞ്ഞു. മുമ്പ് എൽഡിഎഫ്, യുഡിഎഫ് സർക്കാറുകൾ മാറി മാറി ഭരണത്തിലിരുന്ന നിലയായിരുന്നു കേരളത്തിൽ. എന്നാൽ 2021 ൽ ഭരണതുടർച്ച വന്നതോടെ തുടർച്ച വേണ്ട പല വലിയ വികസന പദ്ധതികളും പൂർത്തിയാക്കാൻ സാധിച്ചു.
കഴിഞ്ഞ ദിവസം ആലപ്പുഴ ജില്ലയിൽ ഉദ്ഘാടനം ചെയ്ത പെരുമ്പളം പാലം ഒറ്റപ്പെട്ട ഒരു ദ്വീപിലെ ജനങ്ങൾക്ക് മുഖ്യധാരയിലേക്ക് എത്താനുള്ള വഴിയൊരുക്കി. 2016 ൽ നിർമാണം തുടങ്ങിയ, നീളം കൂടിയ പാലത്തിന്റെ പ്രവൃത്തി 2026 ലാണ് പൂർത്തീകരിച്ചത്.
അതുപോലെയാണ് പുനരുദ്ധരിച്ച ആലപ്പുഴ-ചങ്ങനാശ്ശേരി റോഡും. മഴ കനത്താൽ വെള്ളം കയറിയിരുന്ന ഈ റോഡ് ഏതു മഴ വന്നാലും മുങ്ങി പോകാത്ത രീതിയിലാണ് പുനരുദ്ധരിച്ചത്. എറണാകുളം ചെല്ലാനത്ത് മഴക്കാലത്ത് വീടുകളിൽ വെള്ളം കയറുന്ന ദുരിതാവസ്ഥയ്ക്ക് പരിഹാരമായാണ് ടെട്രോപോഡ് കടൽഭിത്തി നിർമ്മിച്ചത്. പദ്ധതിയുടെ ഒന്നാംഘട്ടത്തിന്റെ പൂർത്തീകരണവും രണ്ടാം ഘട്ടത്തിന്റെ ഉദ്ഘാടനവുമാണ് കഴിഞ്ഞ ദിവസം നിർവഹിച്ചത്. ഇത്തരത്തിൽ വലിയ വികസന പദ്ധതികൾ യാഥാർത്ഥ്യമാക്കാൻ സഹായിച്ചത് ഭരണ തുടർച്ചയാണ്, മുഖ്യമന്ത്രി ചൂണ്ടിക്കാട്ടി. 2021 ൽ അധികാരത്തിലേറിയ ശേഷം 100 പാലങ്ങൾ പൂർത്തീകരിക്കുക എന്ന ലക്ഷ്യം സർക്കാർ മൂന്നു വർഷത്തിൽ കൈവരിച്ചു. ഇപ്പോൾ പാലങ്ങളുടെ എണ്ണം 150 കടന്ന് 200 ലേക്ക് അടുക്കുകയാണെന്ന് മുഖ്യമന്ത്രി പറഞ്ഞു.