ന്യൂഡല്ഹി: തുടര്ച്ചയായ ഒമ്പതാം ബജറ്റുമായി ധനമന്ത്രി നിര്മല സീതാരാമന് റെക്കോര്ഡിലേക്ക്. 2026-27 സാമ്പത്തിക വര്ഷത്തേക്കുള്ള കേന്ദ്ര ബജറ്റ് ഫെബ്രുവരി ഒന്നിന് അവതരിപ്പിക്കും. പ്രതിരോധ മന്ത്രി രാജ്നാഥ് സിങിന്റെ അധ്യക്ഷതയില് ചേര്ന്ന പാര്ലമെന്ററി കാര്യ കാബിനറ്റ് കമ്മിറ്റി ബജറ്റ് സമ്മേളനത്തിന്റെ കലണ്ടറിന് അംഗീകാരം നല്കി.
സമ്മേളന നടപടികള് ജനുവരി 28 ന് പാര്ലമെന്റിന്റെ ഇരുസഭകളെയും അഭിസംബോധന ചെയ്തുകൊണ്ടുള്ള രാഷ്ട്രപതിയുടെ പ്രസംഗത്തോടെ ആരംഭിക്കും. ജനുവരി 29 ന് സാമ്പത്തിക സര്വേ പാര്ലമെന്റില് സമര്പ്പിക്കും. ബജറ്റ് സമ്മേളനത്തിന്റെ ആദ്യ ഘട്ടം ജനുവരി 28 മുതല് ഫെബ്രുവരി 13 വരെയും രണ്ടാം ഘട്ടം മാര്ച്ച് ഒന്പത് മുതല് ഏപ്രില് രണ്ട് വരെയും നടക്കും. ചരിത്രത്തില് ആദ്യമായാണ് കേന്ദ്ര ബജറ്റ് ഒരു ഞായറാഴ്ച അവതരിപ്പിക്കുന്നത്.
ഇന്ത്യയുടെ ചരിത്രത്തിലെ 88-ാമത് ബജറ്റും. മാത്രമല്ല തുടര്ച്ചയായി ഒമ്പത് ബജറ്റുകള് അവതരിപ്പിക്കുന്ന ആദ്യത്തെ ധനമന്ത്രി എന്ന റെക്കോര്ഡ് നിര്മല സീതാരാമന് സ്വന്തമാക്കും. 2019 ലാണ് ഇന്ത്യയുടെ ആദ്യത്തെ പൂര്ണസമയ വനിതാ ധനമന്ത്രിയായി നിര്മല സീതാരാമന് നിയമിതയായത്.
മുന് പ്രധാനമന്ത്രി മൊറാര്ജി ദേശായി പത്ത് ബജറ്റുകളും മുന് ധനമന്ത്രിമാരായ പി. ചിദംബരം ഒമ്പത് ബജറ്റുകളും പ്രണബ് മുഖര്ജി എട്ട് ബജറ്റുകളും അവതരിപ്പിച്ചിട്ടുണ്ട്. എന്നാല് ഇവയൊന്നും തുടര്ച്ചയായിട്ട് ആയിരുന്നില്ല