കടയ്ക്കൽ: കടയ്ക്കൽ പോലീസ് സ്റ്റേഷൻ പരിധിയിൽ ആനപ്പാറ എന്ന സ്ഥലത്ത് 19.10.2025 രാത്രി 7.30 മണിയ്ക്ക് ശശി(58) (നെല്ലിക്കുന്ന് പുത്തൻവീട് തൃക്കണ്ണാപുരം, ആനപ്പാറ പി.ഒ കടയ്ക്കൽ) എന്നയാൾ തലയ്ക്ക് പരിക്ക്പറ്റി രക്തം വാർന്ന് റോഡിൽ കിടക്കുന്നതായി പോലീസിന് വിവരം ലഭിച്ചതിനെ തുടന്ന് പോലീസ് സ്ഥലത്തെത്തി ഇയാളെ കടയ്ക്കൽ ഗവ: താലൂക്ക് ആശുപത്രി എത്തിക്കുകയും, തുടർന്ന് ചികിത്സയ്ക്കായി തിരുവനന്തപുരം മെഡിക്കൽ കോളേജിലേയ്ക്കു കൊണ്ടു പോകുകയും അവിടെ വച്ച് രാത്രി 10.20 മണിക്ക് മരണപ്പെട്ടു.
തുടർന്ന് കടയ്ക്കൽ പോലീസ് നടത്തിയ അന്വേഷണത്തിൽ മരണപ്പെട്ട ശശിയും കടയ്ക്കൽ ആനപ്പാറ വെള്ളൂർ ഏലയിൽ കിഴക്കുംകര പുത്തൻവീട്ടിൽ പുരുഷോത്തമൻ മകൻ കുന്താലി രാജുവും(55) തമ്മിൽ ആനപ്പാറ വച്ച് വാക്കുതർക്കവും അടികലശലും ഉണ്ടായിട്ടുള്ളതാണ് എന്ന വിവരം ലഭിക്കുകയുണ്ടായി. കടയ്ക്കൽ പോലീസ് സ്റ്റേഷൻ എസ്.എച്ച്.ഒ സുബിൻ തങ്കച്ചന്റെ നേതൃത്വത്തിൽ കടയ്ക്കൽ പോലീസ് സ്റ്റേഷനിലെ ഉദ്യോഗസ്ഥരും ചേർന്ന് നടത്തിയ അന്വേഷണത്തിന്റെ ഭാഗമായാണ് പ്രതി രാജുവിനെ കൃത്യം നടന്നു 48 മണിക്കൂറിനുള്ളിൽ അറസ്റ്റ് ചെയ്യാൻ സാധിച്ചത്.