തിരുവനന്തപുരം: തിരുവനന്തപുരത്ത് ഓട്ടോയിൽ കടത്താൻ ശ്രമിച്ച നാല് കിലോ കഞ്ചാവുമായി യുവതി പിടിയിൽ. വലിയവേളി സ്വദേശിനി 30-കാരിയായ ബിന്ദുവിനെ ആണ് ഡാൻസാഫ് സംഘം അറസ്റ്റ് ചെയ്തത്. വേളി ടൂറിസ്റ്റ് വില്ലേജ് വഴി ഓട്ടോറിക്ഷയിൽ കടത്താൻ ശ്രമിച്ചപ്പോഴാണ് രഹസ്യ വിവരം ലഭിച്ചതിന്റെ അടിസ്ഥാനത്തിൽ നടത്തിയ പരിശോധനയിൽ 4 കിലോ കഞ്ചാവ് പിടികൂടിയത്.
വെട്ടുകാട് ബാലനഗറിൽ നിന്നും വലിയ വേളിയിലേക്ക് പോകാനാണ് ഇവർ ഓട്ടോയിൽ കയറിയതെന്ന് ഓട്ടോ ഡ്രൈവർ പറഞ്ഞു. ബിന്ദുവിന്റെ ഭർത്താവ് കാർലോസ് നേരത്തെ കഞ്ചാവ് കേസുകളിൽ പ്രതിയാണ്. സിറ്റി ഡാൻസാഫ് സംഘമാണ് പ്രതിയെ അറസ്റ്റ് ചെയ്തത്. ചോദ്യം ചെയ്ത ശേഷം ഇവരെ കോടതിയിൽ ഹാജരാക്കുമെന്ന് പൊലീസ് അറിയിച്ചു.