കൊട്ടാരക്കര : ആയിരങ്ങൾക്ക് അറിവിന്റെ ദിവ്യ വെളിച്ചം പകർന്നുനൽകി സമൂഹത്തിന്റെ സമസ്ത മേഖലകളിലും ആറുപതിറ്റാണ്ടായി ഒട്ടനവധി പ്രതിഭാധനരെ വാർത്തെടുത്ത കൊട്ടാരക്കരയിലെ സരസ്വതി ക്ഷേത്രം സെന്റ് ഗ്രിഗോറിയോസ് കോളജ് വജ്ര ജൂബിലി നിറവിൽ. പരിശുദ്ധ പരുമല തിരുമേനിയുടെ നാമത്തിൽ,1964 ൽ കാലം ചെയ്ത പരിശുദ്ധ ബസേലിയോസ് മാത്യൂസ് കാതോലിക്കാ ബാബയുടെ തൃക്കരങ്ങളാൽ സ്ഥാപിതമായ സെൻ്റ് ഗ്രിഗോറിയോസ് കോളേജ് ആറു പതിറ്റാണ്ട് പിന്നിടുന്നു.
കേരള യൂണിവേഴ്സിറ്റിയിലെ ഏറ്റവും പ്രമുഖമായ ഉന്നത വിദ്യാഭ്യാസ കേന്ദ്രമായി നാക് അക്രഡിറ്റേഷനിൽ എ ഗ്രേഡ് നേടി കഥകളിയുടെ ഈറ്റില്ലമായ കൊട്ടാരക്കരയുടെ വിദ്യാഭ്യാസ സാംസ്കാരിക മുന്നേറ്റത്തിന് വഴിതെളിച്ച നമ്മുടെ ഈ കലാലയം ഗ്രിഗോറിയോൻ കുന്നിൻ മുകളിൽ തലയെടുപ്പോടെ നിൽക്കുന്നു. ഒരു വർഷം നീണ്ടു നിൽക്കുന്ന ആഘോഷ പരിപാടികൾ 19 ന് പരിശുദ്ധ കാതോലിക്കാ ബാവാ ഉദ്ഘാടനം ചെയ്യും. ആഘോഷ പരിപാടികൾ ഡിസംബർ 18, 19 തീയതികളിൽ നടക്കും. 18ന് ഉച്ചയ്ക്ക് 1 മണിക്ക് ശാസ്താംകോട്ട മൗണ്ട് ഹൊറേബ് ആശ്രമത്തിലെ, കോളേജ് സ്ഥാപകൻ പരിശുദ്ധ ബസേലിയോസ് മാർത്തോമ്മാ മാത്യൂസ് ദ്വിതീയൻ കാതോലിക്കാ ബാബയുടെ കബറിടത്തിൽ നിന്ന് ആരംഭിക്കുന്ന ദീപശിഖ പ്രയാണം 3 ന് കൊട്ടാരക്കര മാർത്തോമ്മാ ഗേൾസ് ഹൈസ്കൂൾ അങ്കണത്തിൽ എത്തിച്ചേരുകയും തുടർന്ന് ജൂബിലി വിളംബര ഘോഷയാത്രയായി കോളേജിൽ എത്തിച്ചേരും.
19ന് രാവിലെ 10.30 ന് ഉദ്ഘാടന സമ്മേളനം. പരിശുദ്ധ ബസേലിയോസ് മാർത്തോമ്മാ മാത്യൂസ് ത്രിതീയൻ കാതോലിക്കാ ബാവ ഒരു വർഷം നീണ്ടു നിൽക്കുന്ന ആഘോഷപരിപാടികൾ ഉദ്ഘാടനം ചെയ്യും. ഓർത്തഡോക്സ് സഭ നിലയ്ക്കൽ ഭദ്രാസനാധിപൻ ഡോ.ജോഷ്വാ മാർ നിക്കോദിമോസ് അധ്യക്ഷത വഹിക്കും.മന്ത്രി കെ.എൻ. ബാലഗോപാൽ മുഖ്യപ്രഭാഷണവും കൊടിക്കുന്നിൽ സുരേഷ് എം.പി ജൂബിലി സന്ദേശവും നൽകും.മലങ്കര കത്തോലിക്ക സഭ മാവേലിക്കര രൂപതാ അധ്യക്ഷൻ ഡോ.ജോഷ്വ മാർ ഇഗ്നാത്തിയോസ്, ഓർത്തഡോക്സ് സഭ കോട്ടയം ഭദ്രാസനാധിപൻ ഡോ.യുഹാനോൻ മാർ ദിയസ്കോറോസ്, കൊട്ടാരക്കര -പുനലൂർ ഭദ്രാസനാധിപൻ ഡോ.യുഹാനോൻ മാർ തേവോദോറോസ് എന്നിവർ അനുഗ്രഹ പ്രഭാഷണം നടത്തും. എൻഎസ്എസ് ഭവന ദാന പ്രോജക്ട്-സ്നേഹ സ്പർശം കേരള സർവകലാശാല രജിസ്ട്രാർ ഡോ. കെ.എസ്.അനിൽകുമാർ ഉദ്ഘാടനം ചെയ്യും. മുൻസിപ്പൽ ചെയർമാൻ എസ്.ആർ. രമേശ്,കോളേജിയേറ്റ് എഡ്യൂക്കേഷൻ ഡെപ്യൂട്ടി ഡയറക്ടർ ഡോ.വി.കെ. അനുരാധ, മുൻസിപ്പൽ കൗൺസിലർ ജെയ്സി ജോൺ,മുൻ പ്രിൻസിപ്പൽ പ്രൊഫ. ടി.ജെ. ജോൺസൺ, അലുമ്നി അസോസിയേഷൻ വൈസ് പ്രസിഡന്റ് കെ.ഒ.രാജുക്കുട്ടി, പിടിഎ വൈസ് പ്രസിഡൻറ് സുനി. പി.സാമുവേൽ,കോളേജ് യൂണിയൻ ചെയർമാൻ അജിൻ രാജ് എന്നിവർ പ്രസംഗിക്കും. പ്രിൻസിപ്പൽ ഡോ.സുമി അലക്സ് സ്വാഗതവും ജനറൽ കൺവീനർ ഡോ. ഫ്രാൻസിസ് ചാക്കോ കൃതജ്ഞതയും പറയും.
ഒരു വർഷം നീണ്ടു നിൽക്കുന്ന ആഘോഷ പരിപാടികളുടെ ഭാഗമായി വിവിധ ഡിപ്പാർട്ട്മെന്റുകളുടെ നേതൃത്വത്തിൽ അന്തർദേശീയ-ദേശീയ സെമിനാറുകൾ, ക്വിസ് മത്സരങ്ങൾ,ഫിലിം ഫെസ്റ്റ്, പെയിൻറിംഗ് – ക്രാഫ്റ്റ് എക്സിബിഷൻ,നേച്ചർ ഫോട്ടോഗ്രാഫി മത്സരങ്ങൾ,ഡയമണ്ട് ജൂബിലി ഗ്ലോബൽ അലൂമ്നി മീറ്റ്, ഇൻ്റർ കോളിജിയേറ്റ് ബാസ്ക്കറ്റ്ബോൾ ടൂർണ്ണമെൻറ്, ഡിബേറ്റ് കോമ്പറ്റീഷൻ, മാനേജ്മെൻറ് ഫെസ്റ്റ് തുടങ്ങിയ സംഘടിപ്പിക്കുമെന്ന് കോളേജ് മാനേജർ ഫാ.ബേബി തോമസ്,പ്രിൻസിപ്പൽ ഡോ.സുമി അലക്സ്,അഡ്മിനിസ്ട്രേറ്റർ ഫാ.ഡി.ജോർജുകുട്ടി,വൈസ് പ്രിൻസിപ്പൽ ഡോ.ജുബിൻ മറ്റപ്പള്ളി,ജനറൽ കൺവീനർ ഡോ.ഫ്രാൻസിസ് ചാക്കോ എന്നിവർ അറിയിച്ചു.