ശൂരനാട്: യുവാവിനെ വാൾ ഉപയോഗിച്ച് വെട്ടി കൊലപ്പെടുത്താൻ ശ്രമിച്ച പ്രതികളിൽ ഒരാളെ ശൂരനാട് പോലീസ് അറസ്റ്റ് ചെയ്തു. പള്ളിശേരിക്കൽ സലാമിയ മൺസിലിൽ അമീർ(21) ആണ് അറസ്റ്റിലായത്. ശൂരനാട് തെക്ക് കുമരംചിറ വാലു തുണ്ടിൽ വീട്ടിൽ ഷാൻ ആണ് ആക്രമിക്കപ്പെട്ടത്. ഞായറാഴ്ച്ച പുലർച്ചെ 1.30 മണിയോടെയാണ് കേസിനാസ്പദമായ സംഭവം. ശൂരനാട് തെക്ക് സ്വദേശിയായ നൗഫൽ, അമീർ എന്നിവർ ചേർന്നാണ് ആക്രമിച്ചത്. പ്രതികൾക്ക് ഷാനിനോടുള്ള മുൻവിരോധം കാരണം വീട്ടിൽ നിന്നും വിളിച്ചിറക്കി വാൾ കൊണ്ട് വെട്ടുകയായിരുന്നു. സംഭവത്തിന് ശേഷം ഒളിവിൽ പോയ നൗഫലിനായി പോലീസ് അന്വേഷണം ഊർജ്ജിതമാക്കി. ശൂരനാട് എസ്.ഐ രാജൻബാബു, എ.എസ്.ഐ ഹർഷാദ് എന്നിവരടങ്ങിയ പോലീസ് സംഘമാണ് പ്രതിയെ അറസ്റ്റ് ചെയ്തത്.