കേരളാ പാരാമെഡിക്കൽ കൗൺസിൽ രജിസ്‌ട്രേഷൻ സർട്ടിഫിക്കറ്റിന്റെ കാലാവധി പുതുക്കണം. സർട്ടിഫിക്കറ്റ് ലഭിച്ച തീയതി മുതൽ ഓരോ അഞ്ചു വർഷവും പൂർത്തിയാകുന്ന മുറയ്ക്കാണ് സർട്ടിഫിക്കറ്റ് രജിസ്‌ട്രേഷൻ പാരാമെഡിക്കൽ കൗൺസിലിൽ പുതുക്കേണ്ടത്. അഞ്ച് വർഷം മുമ്പ് രജിസ്‌ട്രേഷൻ ലഭിച്ചവർക്ക് ഓരോ അഞ്ചു വർഷത്തേക്കുമുള്ള ഫീസടച്ച് രജിസ്‌ട്രേഷൻ പുതുക്കാം. രജിസ്‌ട്രേഷൻ പുതുക്കേണ്ടവർ അതിനായി അഡീഷണൽ സെക്രട്ടറി & സെക്രട്ടറി, പാരാമെഡിക്കൽ കൗൺസിൽ, ആരോഗ്യകുടുംബക്ഷേമ വകുപ്പ്, 6-ാം നില, അനക്‌സ് 2, ഗവ.സെക്രട്ടേറിയേറ്റ്, തിരുവനന്തപുരം-695 001 എന്ന വിലാസത്തിൽ വെള്ള കടലാസിൽ തയ്യാറാക്കിയ അപേക്ഷ സമർപ്പിക്കണം. അപേക്ഷയോടൊപ്പം അസൽ രജിസ്‌ട്രേഷൻ സർട്ടിഫിക്കറ്റും അപേക്ഷകന്റെ തിരിച്ചറിയൽ രേഖയുടെ പകർപ്പും നൽകണം. ഓരോ അഞ്ചുവർഷ കാലയളവിലേക്കും 500 രൂപ വീതം ഫീസ് അടയ്ക്കണം. നിലവിൽ അഞ്ച് വർഷ കാലാവധി പൂർത്തിയായിട്ടില്ലാത്ത രജിസ്‌ട്രേഷൻ സർട്ടിഫിക്കറ്റുകളിൽ കാലാവധി രേഖപ്പെടുത്തുന്നതിന് വെള്ളക്കടലാസിലുള്ള അപേക്ഷയും അസൽ സർട്ടിഫിക്കറ്റും അപേക്ഷകന്റെ തിരിച്ചറിയൽ രേഖയും ഹാജരാക്കണം. ഇതിന് പ്രത്യേക ഫീസ് ആവശ്യമില്ല.
