കൊല്ലം: കരീപ്ര ഗ്രാമ പഞ്ചായത്തിൽ 99 ശതമാനം വാക്സിനേഷനും പാലിയേറ്റിവ് വിഭാഗത്തിലുള്ളവരുടെ ഒന്നാം ഡോസ് വാക്സിനേഷൻ 100 ശതമാനവും പൂർത്തിയായതായി പഞ്ചായത്ത് പ്രസിഡന്റ് പി. എസ്. പ്രശോഭ പറഞ്ഞു. ഗ്രാമ പഞ്ചായത്തിലെ നെടുമൺകാവ് സാമൂഹിക ആരോഗ്യ കേന്ദ്രത്തിൽ കൊവിഷീൽഡ് ഫസ്റ്റ്, സെക്കന്റ് ഡോസ് വാക്സിൻ ഇതുവരെയും സ്വീകരിക്കാത്തവർക്കായി മെഗാ വാക്സിനേഷൻ ഡ്രൈവ് നടന്നു.
കരുനാഗപ്പള്ളി നഗരസഭാ പരിധിയിൽ ആദ്യ ഡോസ് വാക്സിൻ സ്വീകരിക്കാത്തവരുടെയടക്കം വിവരങ്ങൾ വാർഡ് കൗൺസിലർ മാരുടെ നേതൃത്വത്തിൽ ശേഖരിച്ച് പരമാവധി പേർക്ക് വാക്സിനേഷൻ നൽകി വരികയാണെന്ന് നഗരസഭാ ചെയർമാൻ കോട്ടയിൽ രാജു പറഞ്ഞു. നഗരസഭയിൽ 100% വാക്സിനേഷൻ എന്ന ദൗത്യം ഉടൻ പൂർത്തീകരിക്കുകയാണ് ലക്ഷ്യമിടുന്നതെന്നും അദ്ദേഹം പറഞ്ഞു.