ഓയൂര്‍: മരുതിമലയിലെ ഇക്കോ ടൂറിസം പദ്ധതി ഭൂമി സ്വകാര്യവ്യക്തികള്‍ കൈയേറി തരംമാറ്റാന്‍ ശ്രമിച്ച പശ്ചാത്തലത്തില്‍ വസ്തു വീണ്ടും സര്‍വേ നടത്തുമെന്ന് കൊട്ടാരക്കര തഹസില്‍ദാര്‍ നിര്‍മല്‍കുമാര്‍.
ഇതിനായി സര്‍ക്കാറിന് അപേക്ഷ നല്‍കി. പദ്ധതി ആരംഭിച്ച 2009ന് ശേഷം ഇക്കോ ടൂറിസം ഭൂമി കൈയേറി തരംമാറ്റിയതായി കണ്ടെത്തിയാല്‍ നടപടിയുണ്ടാകും. 2009ന് മുമ്ബുള്ള അവസ്ഥ അറിയാനും രേഖകള്‍ പരിശോധിക്കും. മരുതിമലയില്‍ ഇക്കോ ടൂറിസം നടത്തുന്നതിന് 38.5 ഏക്കര്‍ ഭൂമിയാണ് റവന്യൂ വകുപ്പ് വെളിയം പഞ്ചായത്തിന് 20 വര്‍ഷത്തേക്ക് നല്‍കിയിരിക്കുന്നത്. പ്രതിവര്‍ഷം 1000 രൂപ നിരക്കിലാണ് നല്‍കിയത്.