തിരുവനന്തപുരം: റവന്യൂ വകുപ്പിലെ ഡിജിറ്റല് സേവനങ്ങളുടെ ഉദ്ഘാടനം നാളെ രാവിലെ 11.30ന് മുഖ്യമന്ത്രി പിണറായി വിജയന് നിര്വഹിക്കും. തിരുവനന്തപുരം അയ്യന്കാളി ഹാളില് നടക്കുന്ന ചടങ്ങില് റവന്യൂ മന്ത്രി കെ. രാജന് അധ്യക്ഷത വഹിക്കും. ഇ-പേയ്മെന്റ് ആപ്ലിക്കേഷന്, ഫീല്ഡ്മെഷര്മെന്റ് സ്കെച്ച്, തണ്ടപ്പേര് അക്കൗണ്ട്, ലൊക്കേഷന് മാപ്പ് എന്നിവ ഓണ്ലൈനായി ലഭിക്കുന്നതിനുള്ള മോഡ്യൂള്, ഭൂമി തരം മാറ്റുന്നതിനുള്ള അപേക്ഷ ഓണ്ലൈനില് സമര്പ്പിക്കാനുള്ള മോഡ്യൂള്, അടിസ്ഥാന നികുതി രജിസ്റ്റര്, തണ്ടപ്പേര് അക്കൗണ്ട് എന്നിവയുടെ ഡിജിറ്റൈസേഷന് പൂര്ത്തീകരണം, വില്ലേജ് ഓഫീസുകള്ക്ക് വെബ്സൈറ്റ്, റവന്യൂ ഇ-സര്വീസ് പോര്ട്ടല് നവീകരണം, ക്വിക് പേ സംവിധാനം, സോഷ്യല് സെക്യൂരിറ്റി പെന്ഷന് നല്കുന്നതിനുള്ള ഓണ്ലൈന് മോഡ്യൂള് എന്നിവയാണ് സജ്ജമാകുന്നതെന്ന് റവന്യൂ മന്ത്രി കെ. രാജന് വാര്ത്താസമ്മേളനത്തില് പറഞ്ഞു.