രോഗിയുടെ ആക്രമണത്തിൽ നിയന്ത്രണം വിട്ട് ആംബുലൻസ് മറിഞ്ഞ് ഡ്രൈവർക്ക് പരിക്ക്. കാട്ടാക്കട ചീനിവിള അണപ്പാടാണ് സംഭവം. മദ്യലഹരിയിലായിരുന്ന രോഗി ഡ്രൈവറുടെ കഴുത്തിന് കയറിപ്പിടിച്ചത് ആണ് അപകടത്തിന് കാരണമായത്.
കാട്ടാക്കട താലൂക്ക് ആശുപത്രിയിൽ ചികിത്സ തേടിയ എത്തിയ യുവാവാണ് ആംബുലൻസ് ഡ്രൈവറുടെ കഴുത്തിന് കയറിപ്പിടിച്ചത്. ചികിത്സ നേടിയ ശേഷം കുഴിവിളയിലെ വീട്ടിലേക്ക് പോകാൻ ആംബുലൻസിൽ ഡ്രൈവർക്കൊപ്പം സംസാരിച്ചിരുന്ന യുവാവ് അണപ്പാട് എത്തിയതോടെ അക്രമാസക്തനാവുകയായിരുന്നു. പെട്ടന്നുള്ള ആക്രമണത്തിൽ നിയന്ത്രണം നഷ്ടമായ ആംബുലൻസ് സമീപത്തെ പുരയിടത്തിലേക്ക് മറിയുകയായിരുന്നു.
നേരത്തെ ചികിത്സ തേടിയെത്തിയ സമയത്ത് ആശുപത്രിയിൽ ബഹളം വച്ചതിനേത്തുടർന്ന് ഇയാൾക്കൊപ്പമുണ്ടായിരുന്നവർ യുവാവിനെ ആശുപത്രിയിൽ വിട്ട് മടങ്ങുകയായിരുന്നു.