പശ്ചിമ ബംഗാളിലെ തിരഞ്ഞെടുപ്പിനു ശേഷമുള്ള അക്രമങ്ങളെക്കുറിച്ച് അന്വേഷണം ആവശ്യപ്പെട്ടുള്ള ഹര്ജികളില് ബലാത്സംഗം, കൊലപാതകം എന്നിവയില് സിബിഐ കോടതി നിരീക്ഷണത്തില് അന്വേഷണം നടത്താന് കല്ക്കട്ട ഹൈക്കോടതി ഉത്തരവിട്ടു. തിരഞ്ഞെടുപ്പിനു ശേഷമുള്ള അക്രമങ്ങളുമായി ബന്ധപ്പെട്ട മറ്റ് എല്ലാ കുറ്റകൃത്യങ്ങളും അന്വേഷിക്കാന് പ്രത്യേക അന്വേഷണ സംഘം (എസ്ഐടി) രൂപീകരിക്കാനും ഹൈക്കോടതി ഉത്തരവിട്ടു. രണ്ട് അന്വേഷണങ്ങളും കോടതി നിരീക്ഷിക്കുമെന്ന് ബെഞ്ച് അറിയിച്ചു.
‘എല്ലാ കൊലപാതക കേസുകളും ബലാത്സംഗക്കേസുകളും സിബിഐക്ക് അന്വേഷണത്തിനായി നല്കണം,’ ആക്ടിംഗ് ചീഫ് ജസ്റ്റിസ് രാജേഷ് ബിന്ഡാല് അധ്യക്ഷനായ അഞ്ചംഗ ബെഞ്ച് വ്യാഴാഴ്ച പറഞ്ഞു. അടുത്ത ആറാഴ്ചയ്ക്കുള്ളില് റിപ്പോര്ട്ട് സമര്പ്പിക്കാന് ഹൈക്കോടതി കേന്ദ്ര ഏജന്സിയോട് ആവശ്യപ്പെട്ടു.
മറ്റ് കേസുകള്ക്കായി, പ്രത്യേക അന്വേഷണ സംഘം രൂപീകരിക്കാന് കോടതി ഉത്തരവിട്ടു. സംഘത്തില് ഐപിഎസ് ഓഫീസര്മാരായ ഡയറക്ടര് ജനറല് (ടെലികമ്മ്യൂണിക്കേഷന്സ്) സുമന് ബാല സാഹു, കൊല്ക്കത്ത പോലീസ് കമ്മീഷണര് സൗമന് മിത്ര, രണ്വീര് കുമാര് എന്നിവര് ഉണ്ടാകും. കോടതി നിര്ദ്ദേശമില്ലാതെ ഒരു പ്രതികൂല നടപടിയും എടുക്കാന് പാടില്ലെന്നും കൊല്ക്കത്ത ഹൈക്കോടതി ഉത്തരവിട്ടു.