7 ദിവസവും കടകൾ തുറക്കണം. കൊച്ചി പോലുള്ള നഗരത്തിൽ രാത്രിയിലും കടകൾ തുറക്കാൻ അനുവദിക്കണമെന്ന് വി.ഡി സതീശൻ പറഞ്ഞു.
നിലവിലെ ലോക്ക് ഡൗൺ നിർദ്ദേശം അശാസ്ത്രീയമെന്ന് പ്രതിപക്ഷ നേതാവ് വി.ഡി സതീശൻ അഭിപ്രായപ്പെട്ടു. 7 ദിവസവും കടകൾ തുറക്കണം. കൊച്ചി പോലുള്ള നഗരത്തിൽ രാത്രിയിലും കടകൾ തുറക്കാൻ അനുവദിക്കണമെന്ന് വി.ഡി സതീശൻ പറഞ്ഞു.
മഹാമാരിക്കൊപ്പം സാമ്പത്തിക മാന്ദ്യമുണ്ടായ സാഹചര്യത്തിൽ കോവിഡ് ദുരന്തനിവാരണ കമ്മീഷൻ രൂപീകരിക്കാൻ സർക്കാർ തയ്യാറാകണമെന്ന് പ്രതിപക്ഷ നേതാവ് പറഞ്ഞു. പോലീസിന് ഫൈൻവാങ്ങാനുള്ള സംവിധാനമാണ് നിലവിലുള്ളത്. പാവപ്പെട്ടവരിൽ നിന്ന് 2000 വും 3000വും ഫൈൻ വാങ്ങുന്നത് ക്രൂരതയാണ്.
ആരോഗ്യവകുപ്പിന്റെ അശാസ്ത്രീയ രീതികൾ സംസ്ഥാനത്ത് കോവിഡ് കൂടുന്നതിന് കാരണമായി. ജനസാന്ദ്രത കൂടിയ മുബൈയിൽ ഇല്ലാത്ത സ്ഥിതിയാണ് കേരളത്തിൽ.മറ്റ് സംസ്ഥാനങ്ങൾ ചെയ്യുന്ന നല്ല കാര്യങ്ങൾ ഉൾകൊള്ളണം.
കഴിഞ്ഞ ദിവസങ്ങളിലും കോവിഡ് നിയന്ത്രണങ്ങളിലെ അശാസ്ത്രീയത ചൂണ്ടിക്കാട്ടി സംസ്ഥാന സര്ക്കാറിനെതിരെ ആഞ്ഞടിച്ച് പ്രതിപക്ഷ നേതാവ് വി ഡി സതീശന് രംഗത്തെത്തിയിരുന്നു. കോവിഡ് നിയന്ത്രണങ്ങളുടെ മറവില് പോലീസ് അനാവശ്യ പിഴ ചുമത്തുന്നുവെന്ന് അടിയന്തര പ്രമേയ ചര്ച്ചയില് സതീശന് ആരോപിച്ചു.
ജനങ്ങള്ക്ക് സംരക്ഷണം നല്കേണ്ട പോലീസ്, ജനങ്ങളെ പീഡിപ്പിക്കുകയും ഭയപ്പെടുത്തുകയും ചെയ്യുകയാണ്. അവശ്യ സാധനങ്ങള് വാങ്ങാന് പോലും പുറത്തിറങ്ങാന് കഴിയാത്ത സാഹചര്യമാണ് സംസ്ഥാനത്തുള്ളതെന്നും സതീശന് കുറ്റപ്പെടുത്തി. ചരിത്രം പിണറായി സര്ക്കാറിനെ ‘പെറ്റി സര്ക്കാര്’ എന്ന് അടയാളപ്പെടുത്തുമെന്നും സതീശന് പരിഹസിച്ചിരുന്നു.
ജനങ്ങളുടെ ജീവനും സ്വത്തും സംരക്ഷിച്ച് വേണം ഇളവുകള് നല്കേണ്ടതെന്നാണ് സുപ്രീംകോടതി പറഞ്ഞിട്ടുള്ളതെന്നും, ഇത് മനസിലാക്കാതെയുള്ള ഇപ്പോഴത്തെ നിയന്ത്രണങ്ങള് അശാസ്ത്രീയമാണെന്നും അടിയന്തര പ്രമേയത്തിന് അവതരണാനുമതി തേടിയ പ്രതിപക്ഷ എംഎല്എ കെ ബാബു ആരോപിച്ചു. നിയന്ത്രണങ്ങളുടെ മറവില് പോലീസ് കനത്ത പിഴ ഇടാക്കുകയാണ്. സര്ക്കാര് ഉത്തരവില് മാറ്റം വരുത്തണമെന്നും പ്രതിപക്ഷം ആവശ്യപ്പെട്ടു.
അതേസമയം, കടയില് പോകാന് വാക്സീന് സര്ട്ടിഫിക്കറ്റ് വേണമെന്ന നിബന്ധനയില് മാറ്റമില്ലെന്ന് ആവര്ത്തിക്കുകയാണ് സംസ്ഥാന സര്ക്കാര്. വകഭേദം വന്ന ഡെല്റ്റ വൈറസാണ് രണ്ടാം തരംഗത്തില് പടരുന്നതെന്നും രോഗികളുടെ എണ്ണം ഇരട്ടി ആകാന് സാധ്യത ഉണ്ടെന്നും ആരോഗ്യ മന്ത്രി വീണാ ജോര്ജ് നിയമസഭയില് പറഞ്ഞു. ഈ സാഹചര്യത്തില് ജനങ്ങളെ സംരക്ഷിക്കേണ്ട ഉത്തരവാദിത്വം സര്ക്കാരിനുണ്ട്. അതുകൊണ്ടാണ് നിയന്ത്രണങ്ങള് കര്ശനമാക്കുന്നതെന്നും മന്ത്രി കൂട്ടിച്ചേര്ത്തു.