കൊച്ചി: ജനപ്രതിനിധികളുടെ ലക്ഷദ്വീപ് സന്ദര്ശനം തടഞ്ഞത് നിയമ വിരുദ്ധമെന്ന് ഹൈക്കോടതി. എം.പിമാരുടെ അപേക്ഷകള് നിരസിച്ച നടപടി പുനഃപരിശോധിക്കാനും ഹൈക്കോടതി ഉത്തരവിട്ടു. ഒരു മാസത്തിനകം അഡ്മിനിസ്ട്രേഷന് തീരുമാനമെടുക്കണം.
ലക്ഷദ്വീപ് സന്ദര്ശിക്കാന് അനുമതി നിഷേധിച്ചതിനെതിരെ എം.പിമാരായ ടി.എന് പ്രതാപനും ഹൈബി ഈഡനും സമര്പ്പിച്ച ഹര്ജിയിലാണ് ജസ്റ്റീസ് പി.ബി. സുരേഷ് കുമാറിന്റെ ഉത്തരവ്. ലക്ഷദ്വീപിലേക്ക് യാത്ര ചെയ്യുന്നതിനുള്ള അനുമതി സംബന്ധിച്ച ചട്ടങ്ങള് ലംഘിച്ചാണ് അപേക്ഷകള് നിരസിച്ചതെന്ന് കോടതി ഉത്തരവില് വ്യക്തമാക്കി. അപേക്ഷകരുടെ ഭാഗം കേള്ക്കാതെ അപേക്ഷകള് നിരസിച്ചത് നിയമപരമായി തെറ്റാണെന്നും കോടതി പറഞ്ഞു.
എം.പി.മാരെ നേരിട്ടോ ഓണ്ലൈനിലോ കേട്ട ശേഷം മാത്രമേ അപേക്ഷകളില് തീരുമാനമെടുക്കാവൂ എന്നും കോടതി നിര്ദേശിച്ചു. ഏഴുദിവസം ക്വാറന്റൈന് ഇരിക്കാന് തയ്യാറാണെന്നു എം.പിമാര് അറിയിച്ചെങ്കിലും ഭരണകൂടം അനുമതി നല്കിയിരുന്നില്ല. സന്ദര്ശനം രാഷ്ടീയ പ്രേരിതമാണന്നും ക്രമസമാധാന പ്രശ്നങ്ങള് ഉണ്ടാക്കുമെന്നുമുള്ള നിലപാടാണ് ഭരണകൂടം സ്വീകരിച്ചത്. തുടര്ന്നാണ് എം.പി.മാര് കോടതിയെ സമീപിച്ചത്.