എഴുകോൺ : എഴുകോൺ ഇരുമ്പനങ്ങാട് എച്ച്.എസ്.വാർഡിലെ പുളിയറ മൂർത്തിക്കാവ് നിവാസികളുടെ കുടിവെള്ള ക്ഷാമത്തിന് പരിഹാരമാകുന്നു.ജില്ലാ പഞ്ചായത്ത് നടപ്പാക്കുന്ന പുളിയറ കുടിവെള്ള പദ്ധതി ശനിയാഴ്ച ഉച്ചയ്ക്ക് രണ്ടിന് മന്ത്രി കെ.എൻ.ബാലഗോപാൽ നാടിന് സമർപ്പിക്കും. പ്രദേശത്തെ അറുപത് വീടുകൾക്ക് കുടിവെള്ളം ഉറപ്പാക്കുന്നതാണ് പദ്ധതി. പഞ്ചായത്തിലെ ഉയർന്ന പ്രദേശമായ ഇവിടെ വേനൽക്കാലം തുടങ്ങും മുൻപേ കുടിവെള്ള ക്ഷാമം രൂക്ഷമാകും. വില കൊടുത്ത് വെള്ളം വാങ്ങേണ്ട സ്ഥിതിയാണ് തൊഴിലാളികളും പട്ടികജാതിക്കാരുമായ കുടുംബങ്ങൾക്ക്. കരിങ്കല്ല് നിറഞ്ഞ പ്രദേശത്ത് കിണറ് കുത്തി വെള്ളം കണ്ടെത്തുന്നതും പ്രയാസമാണ്.
പ്രാദേശിക കുടിവെള്ള പദ്ധതികൾ പരീക്ഷിച്ചെങ്കിലും പരാജയപ്പെട്ടതോടെയാണ് പ്രദേശവാസികൾ ജില്ലാ പഞ്ചായത്തിനെ സമീപിച്ചത്. ജില്ലാ പഞ്ചായത്തംഗമായിരുന്ന എസ്.പുഷ്പാനന്ദൻ അനുവദിച്ച് നൽകിയ 30 ലക്ഷം രൂപ ചെലവഴിച്ചാണ് പദ്ധതി നടപ്പാക്കിയത്.പുളിയറ കുളത്തിലാണ് കിണറും പമ്പ് ഹൗസും ഒരുക്കിയത്.പ്രദേശവാസിയായ മൂർത്തിവിള വീട്ടിൽ സുരേഷ് കുമാർ സൗജന്യമായി വിട്ടു നൽകിയ വസ്തുവിലാണ് ടാങ്ക് സ്ഥാപിച്ചത്.കെ.എൻ.ബാലഗോപാൽ എം.എൽ.എ. ആയ ശേഷം പദ്ധതിയുടെ നിർമ്മാണ പുരോഗതി വിലയിരുത്തുകയും വൈദ്യുത കണക്ഷനടക്കമുള്ള നടപടികൾ വേഗത്തിലാക്കാൻ നിർദ്ദേശവും നൽകി.ജല അതോറിറ്റാക്കായിരുന്നു നിർമ്മാണ ചുമതല.
ജില്ലാ പഞ്ചായത്ത് വൈസ് പ്രസിഡൻ്റ് എസ്.സുമലാൽ, എഴുകോൺ ഗ്രാമപ്പഞ്ചായത്ത് പ്രസിഡൻ്റ് രതീഷ് കിളിത്തട്ടിൽ, മുൻ ജില്ലാ പഞ്ചായത്തംഗം എസ്.പുഷ്പാനന്ദൻ, ബ്ലോക്ക് പഞ്ചായത്തംഗം എസ്.എച്ച്.കനകദാസ്, അമ്പലക്കര കെ സുരേഷ് കുമാർ ,ഗ്രാമപ ഞ്ചായത്തംഗങ്ങളായ സുധർമ്മ ,രഞ്ജിനി അജയൻ, അസി.എക്സി.എൻജിനീയർ പി. സോണിയ, അസിസ്റ്റന്റ് എൻജിനീയർ ബോസ്.ആർ, എഴുകോൺ സഹകരണ ബാങ്ക് പ്രസിഡന്റ് അഡ്വക്കേറ്റ് ഗോപു കൃഷ്ണൻ,കെ ഓമനക്കുട്ടൻ, എം.പി.മനേക്ഷ, ,അനിൽ കുമാർ, വിക്രമൻ നായർ,വി.സന്ദീപ്, തുടങ്ങിയവർ സമർപ്പണ ചടങ്ങിൽ പങ്കെടുക്കും. ഉന്നത വിജയം നേടിയ പ്രദേശത്തെ വിദ്യാർഥികളെ ചടങ്ങിൽ അനുമോദിക്കും.