കേരളത്തിലെ ജയിലുകളില് നടക്കുന്നത് സ്വര്ണ്ണക്കടത്തു കേസ് അട്ടിമറിക്കാനുള്ള നീക്കങ്ങളാണെന്ന നിഗമനത്തിലാണ് കസ്റ്റംസ് ഉദ്യോഗസ്ഥരെന്ന് സൂചനകള്. ഇതിന്റെ അടിസ്ഥാനത്തില് നയതന്ത്ര പാഴ്സല് സ്വര്ണക്കടത്തു കേസില് കോഫെപോസ തടവുകാരായി പൂജപ്പുര സെന്ട്രല് ജയിലില് കഴിയുന്ന സ്വപ്ന സുരേഷ്, പി എസ് സരിത്ത്, കെ ടി റമീസ് എന്നിവരെ സംസ്ഥാനത്തിനു പുറത്തേ ജയിലുകളിലേക്കു മാറ്റാന് കസ്റ്റംസ് നിയമോപദേശം തേടിയെന്നാണ് ലഭ്യമാകുന്ന വിവരങ്ങള്. കസ്റ്റംസ് ഉദ്യോഗസ്ഥര് നടത്തുന്ന നീക്കം സംസ്ഥാന സര്ക്കാറിനെ കൂടി സമ്മര്ദ്ദത്തിലാക്കുന്നതാണ്. ജയില് ഉദ്യോഗസ്ഥര് കേസില് മൊഴി മാറ്റി പറയാന് പ്രതികളെ ഭീഷണിപ്പെടുത്തുന്നതായുള്ള പരാതിയെ തുടര്ന്നാണ് ഇപ്പോഴത്തെ നീക്കങ്ങളെന്നറിയുന്നു. ബിജെപി ഉള്പ്പെടെയുള്ള പ്രതിപക്ഷപാര്ട്ടികളും ഈ വിഷയം ശക്തമായി ഉന്നയിച്ചു രംഗത്തുവന്നിട്ടുണ്ട്. സ്വര്ണക്കടത്തില് പ്രതിപക്ഷ നേതാവ് രമേശ് ചെന്നിത്തല, കേന്ദ്രമന്ത്രി വി മുരളീധരന്, ബിജെപി അധ്യക്ഷന് കെ സുരേന്ദ്രന് എന്നിവരെ ബന്ധപ്പെടുത്തി മൊഴി നല്കാന് ജയിലിനുള്ളില് സമ്മര്ദ്ദവും പീഡനവും നേരിടുന്നതായി കേസ് ഓണ്ലൈനായി പരിഗണിച്ചപ്പോള് സരിത്ത് സാമ്പത്തിക കുറ്റവിചാരണക്കോടതിയോടു പരാതിപ്പെട്ടിരുന്നു.
മുഖ്യമന്ത്രി പിണറായി വിജയന് അടക്കം വിവാദത്തിലായ കേസില്, പ്രതിപക്ഷ നേതാക്കളെ വലിച്ചിട്ട് രക്ഷപ്പെടാനുള്ള ശ്രമത്തിന്റെ ഭാഗമാണിതെന്നാണ് കസ്റ്റംസ് കരുതുന്നത്. അഭിഭാഷകന് മുഖേന നല്കിയ പരാതിയില് എന്ഐഎ കോടതിയും സരിത്തിന്റെ മൊഴി രേഖപ്പെടുത്തിയിരുന്നു. ഇതോടെ കേസിന്റെ ഗൗരവം വര്ദ്ധിച്ചിട്ടുണ്ട്. മൊഴി മാറ്റാന് തയ്യാറാകാത്തതിനാല് ജയിലില് സ്വപ്നയുടെ ജീവനു ഭീഷണിയുണ്ടെന്ന് സ്വപ്നയുടെ മാതാവും അന്വേഷണ ഉദ്യോഗസ്ഥരെ അറിയിച്ചിരുന്നു. ഈ സാഹചര്യത്തിലാണ് കോടതിയുടെ അനുവാദത്തോടെ പ്രതികളെ സംസ്ഥാനത്തിനു പുറത്തേക്കു മാറ്റാന് ഒരുങ്ങുന്നത്. കോഫെപോസ തടവുകാരെ മൊഴി മാറ്റാന് പ്രേരിപ്പിച്ച ജയില് ഉദ്യോഗസ്ഥര്ക്കെതിരെ നടപടി സ്വീകരിക്കാനുള്ള തയ്യാറെടുപ്പിലാണ് കസ്റ്റംസ് ഉദ്യോഗസ്ഥരും എന്നറിയുന്നു.
അതേസമയം, നയതന്ത്രചാനല് സ്വര്ണ്ണക്കടത്തില് കോണ്ഗ്രസ്-ബിജെപി നേതാക്കള്ക്ക് പങ്കുണ്ടെന്ന മൊഴി നല്കാന് പൂജപ്പുര ജയില് അധികൃതര് ഭീഷണപ്പെടുത്തിയെന്ന സരിത്തിന്റെ മൊഴിയില് കോടതി ഇന്ന് തുടര്ന്നപടികള് സ്വീകരിക്കും. കൊച്ചി എന്ഐഎ കോടതിയില് വൈകിട്ട് മൂന്ന് മണിക്കാണ് വാദം നടക്കുക. ദിവസങ്ങളോളം ഉറങ്ങാന് അനുവദിക്കാതെ ജയില് ഉദ്യോഗസ്ഥര് സമ്മര്ദ്ദത്തിലാക്കിയെന്നാണ് സരിത് കോടതിയ്ക്ക് മൊഴി നല്കിയിട്ടുള്ളത്. കെ ടി റമീസ് ജയിലില് ലഹരിമരുന്ന് ഉപയോഗിച്ചെന്ന ജയില് ഉദ്യോഗസ്ഥരുടെ പരാതിയില് ലഹരി പദാര്ത്ഥ നിരോധന നിയമം (എന്ഡിപിഎസ്) അനുസരിച്ച് തെളിവു ശേഖരിക്കാന് അധികാരമുള്ള കേന്ദ്ര ഏജന്സികളും അന്വേഷണം തുടങ്ങിയതായാണ് വിവരം. ലഹരിപദാര്ഥങ്ങള് അടങ്ങിയ പാഴ്സല് റമീസിനു വേണ്ടി ജയിലില് എത്തിയെന്ന പരാതിയിലെ പരാമര്ശം ഏറെ ഗൗരവത്തേടെയാണ് ഉദ്യോഗസ്ഥരും നോക്കിക്കാണുന്നത്.