കോവിഡ് കാരണം മുടങ്ങിയിരുന്ന തിരുവനന്തപുരം – ബംഗളുരൂ സര്‍വ്വീസ് കെഎസ്ആര്‍ടിസി പുനഃരാരംഭിച്ചു. കോവിഡ് മാനദണ്ഡങ്ങളില്‍ ഇളവ് വന്ന സാഹചര്യത്തില്‍ ഇരു സംസ്ഥാനങ്ങളും സര്‍വ്വീസുകള്‍ ആരംഭിക്കാന്‍ തീരുമാനിച്ചതിന്റെ അടിസ്ഥാനത്തിലാണ് കെഎസ്ആര്‍ടിസി സര്‍വ്വീസ് ആരംഭിച്ചത്. ഏപ്രില്‍ 9 മുതല്‍ നിര്‍ത്തി വെച്ച സര്‍വ്വീസാണ് തിരുവനന്തരപുരത്തു നിന്ന് വീണ്ടും ആരംഭിച്ചത്. ഞായറാഴ്ച വൈകുന്നേരം 5 മണിക്കാണ് സര്‍വ്വീസ് ആരംഭിച്ചത്.
ആലപ്പുഴ, തൃശ്ശൂര്‍, കോഴിക്കോട് ,സുല്‍ത്താന്‍ ബത്തേരി ,മൈസൂര്‍, മാണ്ഡ്യ വഴിയാണ് ബംഗളൂരു സര്‍വ്വീസ് ആദ്യ ദിനം സര്‍വ്വീസ് നടത്തുക . ആദ്യ ദിവസം തന്നെ സീറ്റുകളെല്ലാം നേരത്തേ തന്നെ ബുക്ക് ചെയ്തിരുന്നു. കോവിഡ് മാനദണ്ഡങ്ങള്‍ പാലിച്ചാണ് സര്‍വ്വീസുകള്‍ നടത്തുക.
അന്തര്‍ സംസ്ഥാന ഗതാഗതത്തിന് തമിഴ്‌നാട് സര്‍ക്കാര്‍ ഇത് വരെ അനുമതി നല്‍കിയിട്ടില്ല. അത് കൂടി ലഭിച്ചാല്‍ പാലക്കാട് സേലം വഴിയുള്ള ബംഗളുരു സര്‍വ്വീസ് ആരംഭിക്കാനാകും. ഇനിനായി ആദ്യഘട്ടമെന്ന നിലയിലേക്ക് തമിഴ്‌നാട്ടിലേക്ക് സര്‍ക്കാര്‍ ഉദ്യോഗസ്ഥര്‍ക്കുള്ള ബോണ്ട് സര്‍വ്വീസ് നടത്താന്‍ കോയമ്പത്തൂര്‍ കളക്ടര്‍ അനുമതി നല്‍കിയിട്ടുണ്ട്. അതിന്റെ അടിസ്ഥാനത്തില്‍ പാലക്കാട് – കോയമ്പത്തൂര്‍ ബോണ്ട് സര്‍വ്വീസുകള്‍ തിങ്കളാഴ്ച മുതല്‍ ആരംഭിക്കും. ഏതാനും ദിവസങ്ങള്‍ക്കുള്ളില്‍ തന്നെ തമിഴ്‌നാട് അന്തര്‍സംസ്ഥാന ഗതാഗതത്തിനുള്ള അനുമതിനല്‍കുമെന്നാണ് കെഎസ്ആര്‍ടിസിയുടെ പ്രതീക്ഷ.