മനാമ: ഉയര്‍ന്ന അപകടസാധ്യതയുള്ള വ്യക്തികള്‍ക്ക് ബൂസ്റ്റര്‍ ഡോസ് ഇടവേള കുറച്ചു. രണ്ടാമത്തെ ഡോസ് വാക്സിന്‍ സ്വീകരിച്ച്‌ ഒരു മാസം കഴിഞ്ഞവര്‍ക്ക് ഇനി ബൂസ്റ്റര്‍ ഡോസ് സ്വീകരിക്കാമെന്ന് കോവിഡ് പ്രതിരോധത്തിനുള്ള ദേശീയ മെഡിക്കല്‍ ടാസ്ക്ഫോഴ്സ് അറിയിച്ചു. ഇതുവരെ മൂന്ന് മാസമായിരുന്നു ബൂസ്റ്റര്‍ ഡോസിനുള്ള ഇടവേള.
50 വയസ്സിന് മുകളിലുള്ളവര്‍, അമിതവണ്ണമുള്ളവര്‍, കുറഞ്ഞ രോഗപ്രതിരോധ ശേഷിയുള്ളവര്‍, കോവിഡ് മുന്‍നിര പോരാളികള്‍ എന്നിവരാണ് ഉയര്‍ന്ന അപകടസാധ്യതയുള്ള വിഭാഗത്തില്‍ ഉള്‍പ്പെടുന്നത്. രോഗപ്രതിരോധ പ്രതികരണം, വൈറസിനെതിരായ സംരക്ഷണം എന്നിവയെക്കുറിച്ചുള്ള ഏറ്റവും പുതിയ തെളിവുകള്‍ പഠിച്ച ശേഷമാണ് തീരുമാനം പ്രഖ്യാപിച്ചത്.
ഉയര്‍ന്ന അപകടസാധ്യതയുള്ള വ്യക്തികള്‍ക്ക്, പ്രത്യേകിച്ച്‌ 50 വയസ്സില്‍ കൂടുതലുള്ളവര്‍ക്ക് രോഗപ്രതിരോധ ശേഷി വര്‍ധിപ്പിക്കാന്‍ ബൂസ്റ്റര്‍ ഡോസ് എടുക്കുന്നത് പ്രധാനമാണെന്ന് ടാസ്ക്ഫോഴ്സ് ചൂണ്ടിക്കാട്ടി. വൈറസ് ബാധിച്ചാല്‍ രോഗം ഗുരുതരമാകുന്നതും മരണം സംഭവിക്കുന്നതും ഒഴിവാക്കാന്‍ ബൂസ്റ്റര്‍ ഡോസ് സഹായിക്കും. നിലവില്‍ സിനോഫാം വാക്സിന്‍ സ്വീകരിച്ചവര്‍ക്കാണ് ബൂസ്റ്റര്‍ ഡോസ് നല്‍കി വരുന്നത്.